FNSH në aksion, zbarkon në Fushë Krujë e Rinas

Forcat e Ndërhyrjes së Shpejtë kanë kryer një tjetër operacion gjatë ditës së sotme. FNSH ka zbarkuar në zonat e Fushës Krujës dhe të Rinasit.

Ende nuk dihen arsyet dhe për çfarë aksioni bëhet fjalë. Duket se policia vijon kërkimet për persona të shpallur në kërkim apo me rrezikshmëri të lartë shoqërore, pas arrestimit të Ramazan Rrajës.

Dyshohet se në zonën e Fushë Krujës e përreth Rinasit mund të jenë fshehur persona në kërkim dhe ndaj ka nisur operacioni.

Mbrëmë policia arrestoi Ramazan Rrajën te Ura e Gjolës në Kurbin, në një rrugë pa ndriçim, ku dyshohet se ai po priste person tjetër. Rraja ishte i armatosur.

Ai dyshohet se kishte pak kohë që ishte kthyer në Shqipëri, ku pak javë më parë kishte mbërritur në vendin tonë nga Dubai. Struktura antikorrupsion, ka mundur të sigurojë informacione se ai ka mbërritur në Shqipëri e për këtë është urdhëruar që ai të mbahet nën vëzhgim, deri në momentin kur u vu në pranga. Rraja akuzohet për atentat ndaj prokurorit Arian Ndoja.