Një nga katër britanikët e shpallur në kërkim për vrasjen e biznesmenit Ardian Nikulaj rezulton i dënuar dhjetëra herë në Britaninë e Madhe. Burime për News 24 thanë se Harry Simson rezulton i dënuar 27 herë në Britaninë e Madhe.
Sipas pamjeve të kamerave të sigurisë që disponon prokuroria në kuadër të hetimeve të kryera, kur ndodhi vrasja, ai ka marrë dhe birrën me vete.
Ndërsa ka dyshime se ka qenë e dashura e Edmond Haxhisë që ka rrëfyer për grupin hetimor si ka funksionuar grupi kriminal.
Ardian Nikulaj u ekzekutua mesditën e 19 prillit kur sapo kishte hyrë dhe ulur në një tavolinë në lokalin në pronësi të tij në vijën e parë të plazhit të Shëngjinit. Autori, siç u pa nga pamjet, mbante një maskë kirurgjikale, skafandër dhe jelek fosforeshent. Ai futet në lokal, qëllon me armë Nikulajn dhe pasi kryen vrasjen me pistoletë në një distancë shumë të afërt largohet qetësisht me motor nga vendngjarja.
Nikulaj ishte biznesmen në Lezhë, ish-kandidat për deputet në zgjedhjet e 2021-shit dhe kandidat për Këshill Bashkiak në zgjedhjet e 14 majit. Viktima rezulton i arrestuar më herët për armëmbajtje pa leje dhe kontrabandë e falsifikim, ndërkohë që pista ku po hetohej është ajo e gjakmarrjes. Kjo pasi Nikulajt i është vrarë një vëlla nga pjesëtarë të fisit Balaj.
Discussion about this post