Ministri i Jashtëm italian Antonio Tajani ka anuluar udhëtimin e tij në Paris pasi një ministër francez tha se kryeministrja Giorgia Meloni “është e paaftë të zgjidhë problemet e migracionit për të cilat ajo u zgjodh”.
Tajani i konsideroi të papranueshme komentet e ministrit të Brendshëm francez që kritikonte politikën e migracionit të kryeministres italiane.
Italia kishte kërkuar sqarimin e komenteve të ministrit francez Gerald Darmanin në radion RMC ku fajësonte kryeministren italiane Giorgia Meloni për rritjen e numrit të emigrantëve, veçanërisht të të miturve, në kufirin franko-italian.
Darmanin i tha transmetuesit se Meloni “është e paaftë të zgjidhë problemet e migracionit për të cilat u zgjodh.” Ai gjithashtu e akuzoi atë se gënjente popullatën, një ves nga e djathta ekstreme.
Vërejtja ishte njëkohësisht një shigjetim ndaj Melonit dhe udhëheqëses së ekstremit të djathtë francez Marine Le Pen, duke vënë në dukje se Meloni u zgjodh nga “miqtë” e Le Pen.
Komentet e Darmanin erdhën ndërsa Tajani po përgatitej të shkonte për në Paris për t’u takuar me homologun e tij francez. Ministri i Jashtëm italian tha se ofendimet e nisura nga ministri kundër qeverisë italiane nuk ishin në frymën në të cilën duheshin përballur sfidat e përbashkëta europiane.
Discussion about this post