Belind Këlliçi u zotua se transporti urban do të jetë falas pas 14 majit 2023.
Ai deklaroi se do të përfitojnë banorët e qytetit dhe ata të fshatrave.
Duke folur për “Syri Tv”, Bashkia e Tiranës, tha Këlliçi, do të paguajë 16 mln euro në vit për të garantuar urbanin falas për të gjithë qytetarët.
“Autobusi do të jetë pa pagesë pas datës 14 maj. Do të jetë në qytet dhe në fshat. Unë kam marrë biletat 40 lekëshe, por në Bërzhitë është 80 lekë, në Vishje 100 lekë, në Zall Bastar është 120 lekë, në Shkallë 150 lekë, në Shëngjergj është 200 lekë, në Malvise është 400 lekë. Imagjino 400 lekë nga Kinostudio në shtëpi dhe anasjelltas. Në 1 muaj janë 120 mijë lekë”, tha Këlliçi.
Ai theksoi se nga kjo masë e bashkisë, do të përfitojnë direkt 309 mijë qytetarë të Tiranës të cilët përdorin transportin publik. Në buxhetin e tyre familjar do të kursehen çdo muaj 52 mijë lekë.
“Kemi rënë dakord që fokusi i programit tonë do të jetë ulja e kostove të jetesës për qytetarët. Me këtë masë ne i kursejmë 309 mijë familjeve në Tiranë, 52 mijë lekë çdo muaj për 4 vite. Ne nuk blejmë vota, s’është modeli ynë, këtë model e ka bashkia e Tiranës. Ne lehtësojmë xhepat e qytetarëve përmes programit, politikave, dhe nuk e bëjmë njëherë këtë kur vijnë zgjedhjet, por çdo muaj për 4 vite me radhë”, tha Këlliçi./Syri.net
Discussion about this post