Alket Hatia i cilësuar ndryshe si “Zoti i Drogës” pritet që të ekstradohet drejt Italisë. Ministri i Drejtësisë ka firmosur ekstradimin e tij drejt vendit fqinj.
Hatia, i njohur ndryshe si “Zot i drogës”, ka reaguar pas vendimit të ministrit të drejtësisë, Ulsi Manja, i cili firmosi lejen për ekstradimin e tij drejt Italisë.
Hatia, ka thënë për gazetaren Klodiana Lala, se ky vendim është turp për drejtësinë shqiptare.
Ai pohon më tej se kishte besim te institucionet, konkretisht te ministri i Drejtësisë, Ulsi Manja, ndërsa shton se me këtë vendim është bërë ‘kurban’.
“I nderuar ministër kisha shumë shpresë tek drejtësia juaj shpresoja, që familja ime do gjente qetësi meqë kemi një ministër të drejte! Por drejtësia lë për të dëshiruar mesa shoh…Familja ime qenka vetëm në dorë të të madhit Zot. Ky është turp i drejtësisë shqiptare. Më bënë kurban, që fëmijët e tyre të jetojnë në komoditet”, thotë Hatia.
Hatia u arrestua për herë të parë në vitin 2008 me kërkesë të autoriteteve italiane, pasi akuzohej se ishte pjesë e një organizate kriminale në drejtim të trafikimit të qindra kilogramëve heroinë në Itali. Çështja u transferua në Shqipëri për gjykim, ku pas shqyrtimit nga Gjykata e Krimeve të rënda, Hatija u dënua me 10 vjet e 8 muaj burg, dënim të cilin e kreu të plotë në Shqipëri. Kujtojmë se Gjykata e Durrësit rrëzoi kërkesën për ekstradimin e Alket Hatisë në Itali në datë 5 mars të vitit 2018, duke argumentuar se Hatia e ka kryer dënimin 16 vite në Shqipëri për të njëjtat vepra penale që akuzohet në Itali.
Vendimi
Në mars të vitit 2018 Gjykata e Durrësit ka refuzuar kërkesën e prokurorisë për ekstradimin e Alket Hatisë drejt vendit fqinj, i etiketuar në mediat italiane si “Zoti i drogës”. Kjo kërkesë u refuzua nga gjykata me argumentin se është e njëjta çështje për të cilën Hatija është dënuar edhe në Shqipëri. Më konkretisht, gjyqtari Paulin Cera deklaroi se nuk lejohet ekstradimi, kur një pjesë e veprave penale janë kryer në Shqipëri. Gjykata e Durrësit shpjegoi se Hatija e ka kryer dënimin në Shqipëri pasi është dënuar nga Gjykata e Krimeve të Rënda për të njëjtën vepër penale që është dënuar dhe nga drejtësia italiane me 16 vite burg. Ai ka qëndruar në burg nga viti 2008 deri në 2014. 44-vjeçari ka përfituar ulje dënimi për shkak të gjykimit të shkurtuar dhe amnistive të ndryshme që ka përfituar në kohën kur ka qenë në burg. Gjithashtu ai pranoi dhe kërkesën e avokatit të tij mbrojtës, se Hatija e kishte kryer njëherë dënimin për të cilin ai do të ekstradohej. Ai akuzohet se që nga janari i vitit 2003 deri në mars të 2004 ka trafikuar në qytetin e Milanos rreth 350 kilogramë heroinë dhe 190 kg kokainë me vlerë rreth 40 milionë euro. Hatija jetonte në një vilë me bunker në zonën e Beratit, ndërkohë që lëvizte gjatë gjithë kohës i shoqëruar nga persona të armatosur. Bëhet me dije se Hatija ishte një trafikant i “pastër”, pasi nuk prekte asnjë gramë lënde narkotike, por se falë celularëve, të cilët i përdorte një herë dhe i flakte, trafikonte “male” me drogë. Ndaj tij, Gjykata e Apelit në Itali në shtator të vitit 2015 ka dhënë dënimin me 20 vjet burgim.
Discussion about this post