Fëmijët e fshatit Vëndreshë të Skraparit janë të detyruar të mësojnë në kushte anormale. E rrethuar nga mure me lagështi, tavan me trarë dhe pa sisteme ngrohje, është klasa ku fëmijët janë të detyruar të shkojnë çdo ditë duke rrezikuar dhe jetën e tyre.
Në këtë shkollë mësojnë gjithsej pesë fëmijë, prej tyre njëri është në ciklin parashkollor dhe një tjetër në ciklin e lartë, ndërsa 3 fëmijë janë nxënës të ciklit fillor
Në një intervistë për “Gazeta Shqiptare”, Donald Dervishi, drejtor i shkollës Vëndreshë e III në Skrapar tregon se kushtet ku nxënësit arsimohen janë mizerabël, por pavarësisht kësaj, ai qëndron optimist kur shprehet i vendosur se, do ta çojë misionin e tij deri në fund.
“Gjendja e kësaj shkolle është evidentuar dhe vënë në dukje nga ana ime, pasi u bëra drejtor i saj në 16 qershor të 2017-ës. Mund të them që kushtet e shkollës janë mizerabël, nuk mund të jepet mësim në një gjendje të tillë, por misioni fisnik që kemi mbi supe, na bën që të përballemi edhe me situata të tilla. Godina ekzistuese është tashmë e rrënuar”, shprehet Dervishi.
Ai shprehet se godina ku fëmijët zhvillojmë mësim është një ndërtesë private e marrë me qira, pasi godina ekzistente u rrënua, ndërsa tregon se vlera e qirasë shkon rreth 4 mijë lekë në muaj.
“Godina ku ne zhvillojmë mësim aktualisht është një ndërtesë private e marrë me qira për nevojat e shkollës, pasi godina ekzistente u rrënua. Por ne nuk mund t’i lëmë fëmijët pa mësim, është detyra jonë që të gjejmë çdo mënyrë për t’i arsimuar. Qiranë e kësaj godine që ka marrë funksionin e shkollës e paguan Bashkia Skrapar, por vlerën e saktë të pagesës nuk e di, por nuk besoj se është më shumë se 4 mijë lek të reja në muaj. Ka edhe shtëpi të tjera që mund të merren me qira, por nuk ndryshojnë shumë nga kushtet”, thotë mësuesi.
Ndër të tjera, Dervishi tha se ka hequr dorë nga thirrja institucioneve të marrim masa sepse në kaq vite askush nuk ka investuar, por kërkon ndihmën e qytetarëve për të ndërtuar një shkollë të re
Discussion about this post