“Vota jonë plumb për armikun e për katund të fikun”. Kështu shkruan një qytetar në llogarinë e tij në Facebook, teksa ilustron me foto vështirësitë e të kthyerit në shtëpi, pas dhënies së votës në qendrën e votimit.
Kujtim Margjeka, banues në fshatin Bujan të Tropojës, pasi shkoi për të votuar ditën e sotme, ndau me ndjekësit e tij foton e urës së shkatërruar ku ai dhe bashkëshortja e tij duhet të rrezikojnë jetën për të kaluar, për t’u kthyer në shtëpi.
Sipas tij, ura dhe kjo lagje kanë vite që nuk ndryshojnë. Në këtë ditë zgjedhjesh, qytetari e adreson këtë problematikë si një çështje që duhet zgjidhur menjëherë, duke u përpjekur të tërheqë edhe vëmendjen e drejtuesve që po garojnë.
“Në foto gruaja ime duke kaluar urën, shpresojmë të rregullohet një ditë.”, shkruan qytetari në postimin që ka tërhequr vëmendjen e qindra banorëve të tjerë.
“Kjo nuk është njerëzore. Shtylla elektrike është e mbështetur në kavon e urës, dhe ka rrezik në çdo moment. Shpresojmë që të mos marrë jetë njeriu.”, shkruan Margjeka në një nga komentet. “ Kam komunikuar me bashkinë dhe më lart, dhe më është premtuar (rregullimi i urës), por kjo është urgjente” shton ai në një koment tjetër.
Lidhur me problematikën që e shqetëson, Kujtimi shprehet se “nuk ia vlen të votosh”.
Discussion about this post