U arrestua me Laert Haxhiun, kush është 22-vjeçari Firdeus Berberi

Policia e Shtetit njoftoi sot arrestimin e 22-vjeçarit Firdeus Berberi, nga Pogradeci, i shpallur në kërkim ndërkombëtar.

Në njoftimin zyrtar të Policisë, thuhet se ai u kap në shoqërinë e Laert Haxhiut, një tjetër personazh i njohur për drejtësinë dhe i shpallur në kërkim ndërkombëtar për vepra të rënda penale.

“Gjatë operacionit ndërkombëtar të koduar “Eksponenti”, të finalizuar falë informacioneve të siguruara nga Policia e Shtetit dhe shkëmbimit të tyre në kohë reale, ndërmjet Interpol Tiranës dhe Interpol Athinës, u lokalizua në Janinë, u kap dhe u arrestua me qëllim ekstradimin, i shumëkërkuari Laert Haxhiu, bashkë me të cilin janë shoqëruar në Policinë e Janinës, edhe 2 shtetas të tjerë shqiptarë që shoqëronin shtetasin e shumëkërkuar.

Nga verifikimet e kryera ndërmjet Policisë greke dhe Policisë shqiptare, ka rezultuar se njëri prej këtyre shtetasve, konkretisht shtetasi F. B., 22 vjeç, lindur në Pogradec, ishte i shpallur në kërkim kombëtar nga Drejtoria Vendore e Policisë Korçë”, njoftoi Policia.

Ndaj Berberit është caktuar masa e arrestit me burg nga Gjykata e Rrethit Gjyqësor Pogradec për veprën penale “Plagosja e rëndë me dashje”.

Në 25 prill të 2022, Berberi, bashkë me një tjetër person, ka plagosur me thikë në kokë dhe me një plumb pistolete në këmbë, 23-vjeçarin J.M .

Historia e konfliktit mes të rinjve ishte paraprirë nga një konflikt mes familjarëve të autorëve të dyshuar dhe personit që mbeti i plagosur. Konflikti precipitoi në qëllimin me armë ndaj një hoteli në Pogradec, në kulmin e sezonit turistik.

Gjithashtu Firdeus Berberi, i kapur në shoqërinë e Laert Haxhiut, ishte përfshirë edhe në një tjetër incident, teksa po festonte ditëlindjen në lokalin e tij, kohë kur nuk lejoheshin hapja e bareve për shkak të pandemisë. Policia e arrestoi me akuzën se ai kishte shkelur Aktin Normativ që përcakton se ne kohë pandemie nuk lejohen grumbullimet e njerëzve dhe hapja e lokaleve.

Arrestimi i tij erdhi pas ankese nga ana fqinjëve. Në atë kohë 19 vjeç, Berberi, shoqërua në komisariat së bashku me dy miqtë e tij, por Gjykata la në fuqi vetëm “akuzën kundërshtim ndaj policit”, për të cilën vendosi masën e sigurisë arrest në burg për 19 vjeçarin kurse për miqtë e tij “arrest shtëpie”.