Deputeti i Partisë Socialiste, Petro Koçi, ka reaguar lidhur me rritjen e pagave të zyrtarëve të lartë dhe administratës, përfshi këtu edhe deputetët.
Nisma ligjore pritet të miratohet në seancën e së enjtes, ndërsa Kocci në një intervistë për A2Cnn thekson se një status deputeti prej langaraqi do ta bënte edhe vetë Parlamentin langaraq.
“Këto diferenca hapin debat dhe diskutim, por është në dinjitetin e një vendi që Parlamenti të ketë një trajtim normal. Aktualisht, nuk e ka këtë lloj dinjiteti. Sot deputeti është vetë sekretar, vetë shofer… Dikur ka patur makinë dhe shofer në dispozicion nga shteti, nuk kishte nevojë të rrezikonte jetën një person i cili shpenzon orë të tëra në debate dhe takime, e pastaj të kthehet në shtëpi në orët e vona.
Megjithatë, unë nuk besoj se deputetët janë ligësia e këtij vendi. Nëse marrim sot nivelin e jetesës dhe pagat, deputeti, edhe me ndryshimet që do të hyjnë në fuqi, nuk është nga më të paguarit. Nëse marrim pasanikët e këtij vendi, deputetët janë fundi i kavallit. Ka edhe nga ata që janë biznesmenë, por po flas për ata që janë vetëm deputetë, që nuk kanë biznese. Nuk është se kjo na çon në një pozicion kaq shumë të lakmueshëm”, tha Petro Koçi.
Discussion about this post