“Prindi 1” dhe “Prindi 2”, Pano fiton gjyqin kundër nismës së komunitetit LGBTI: Fitore për familjet shqiptare

Pastori Akil Pano ka fituar gjyqin ndaj Komisionerit për Mbrojtjen nga Diskriminimi, i cili kërkonte nga pastori të heshtte ndaj agjendës se komunitetit LGBT, e cila kërkonte që ligji shqiptar të ndryshonte emërimin e prindërve “baba dhe nënë” me “Prindi 1 dhe Prindi 2″.

“Gjyqi u fitua! Sot fitoi familja! Sot fitoi Mami dhe Babi kundër Prindi 1 dhe Prindi 2.

Sot fitoi liria e Fjalës, e Ndërgjegjes dhe e Besimit!

Sot fituan të gjithë shqiptaret që besojnë në ZOT, FAMILJE & KOMB.

Lavdia i takon Zotit”, shkroi pastori Pano në një postim në rrjetet sociale, pas vendimit të Gjykatës.

Ndërsa e konsideron këtë vendim një lajm të mirë, Pano tha se shqiptarët fituan, babai dhe mamaja vijojnë që të jenë babi dhe mami, nuk më prind 1 dhe 2.

“Unë jam shpallur i pafajshëm, jam shumë mirënjohës edhe për shqiptarët e mirë që besojnë se familja është e shenjtë. Ky është lajmi që kemi për ju. Kemi marrë një gur kilometrik fitoreje për çdo babë e nënë në Shqipëri”, bëri me dije pastori Akil Pano.

Ndërsa avokati Altin Goxhaj tha se në gjyqin e sotëm është rrëzuar vendimi i Komisionerit se Pano ka nisur një fushatë keqinformimi të mbushur me gjuhë urrejtjeje ndaj komunitetit LGBTI+, duke përdorur median, rrjetet sociale dhe mbështetjen e ndjekësve të tij. Pretendimi i tyre është rrëzuar.

“LGBT kërkon që të shkojë drejt kafshimit të Kushtetutës. Ky gjyq kishte vlerë kushtetuese. Ata donin që të shkonin drejt Kushtetutës për të hequr babën dhe nënën. Thyerja e hundës sot këtu është një fitore për lirinë e besimit për të gjithë babat dhe nënat e Shqipërisë,”-shtoi Altin Goxhaj.

Pastori Pano reagoi pas një formulari të shpërndarë në institucionet arsimore. Fillimisht ai i kërkoi Ministrisë së Arsimit, drejtorive të shkollave e institucioneve të arsimit që të tërheqin menjëherë nga qarkullimi formularin që ishte shpërndarë nga komuniteti LGBTI. Kërkesa e LGBTI-së në Francë për të zëvendësuar fjalën “nënë” me “prindi 1” hapi një debat të madh. Në Shqipëri kërkesa shihej si një përpjekje për të deformuar familjen, ndërkohë që mbështetësit e grupit pretendonin se ishte një hap më tej drejt barazisë dhe trajtimit njësoj të fëmijëve të këtij grupi.