Tensionet, Kurti: Godinat e komunës janë pronë e Republikës

Pas tensionimit të situatës në 3 komunat në veri të Kosovës ka ardhur edhe reagimi i parë i kryeministrit të Kosovës, Albin Kurti.

Në orët e pasdites Kurti ka pritur në takim komandantin e KFOR-it, Gjeneral Major Ristuccia. Në njoftimin e Qeverisë së Kosovës bëhet e ditur se kryeministri Kurti theksoi se kryetarët e komunave, të zgjedhur nga zgjedhjet e lira dhe demokratike, duhet t’i ushtrojnë detyrat dhe përgjegjësitë e tyre, për të ofruar shërbime publike cilësore për të gjithë qytetarët, pa pengesa.

“Gjithashtu, kryeministri Kurti e njoftoi komandantin Ristuccia se Policia e Kosovës është angazhuar që sipas detyrës zyrtare t’ua mundësojë këtyre kryetarëve hyrjen në vendin e tyre të punës prej nga ata duhet dhe do t’ju shërbejnë të gjithë qytetarëve pa dallim e pa diskriminim”, thuhet mes tjerash në njoftimin e Qeverisë./RTK