Banorët e lagjes nr.13 në Durrës nuk kanë lejuar firmën fituese të tenderit që të nisë punimet për asfaltimin e rrugës në zonën e tyre. Shirat sjellin shpesh herë përmbytje të kësaj zone, ndaj sipas banorëve asfaltimi nuk është zgjidhje e problemit që ato kanë. Të revoltuar nga nisja e punimeve, banorët kanë protestuar, teksa në vendngjarja kanë mbërritur edhe uniformat blu.
Ata shprehen se fillimisht duhet të bëhen kanalizimet, më pas asfaltimi i rrugës, por kjo kërkesë sipas tyre nuk është marrë parasysh nga Bashkia Durrës.
“S’jemi kundër rrugës, po duhet plan rregullues. Këta vijnë me e shtru dhe asfaltuar pa hapur kanalizime dhe ne mbytemi në ujë. Ndaj protestojmë. Rruga mban ujë dhe në behar, jo në dimër.”, thotë një banore.
Banorëve iu duhet të kujdesen vetë nga pasojat që sjell mungesa e kanalizimeve në zonën ku ato banojnë.
“Ka 20 vjet që kemi shumë problem. S’dal dot nga shtëpia se bëhet liqen. Sot kanë ardhur këta me hedh një asfalt dhe me ik. Pa kolektor kjo rruga nuk bëhet. Këtu ka një pusetë që mban gjithë rrugën e për të kujdesem vetë. Vejmë thasë rëre. Njoftova policinë që të na ndihmojë.”
Ndonëse në vendngjarje ishin prezentë forcat e policisë bashkiake dhe atyre të rendit, sërish banorët nuk lejuan firmën që të zhvillojë punimet, ndaj mjetet dhe punëtorët për shtrimin e rrugës janë detyruar të largohen.
Me një fond prej 80,5 milion lekësh nga Fondi Shqiptar i Zhvillimit po bëhet përmirësimi i shtresave asfaltike në 10 rrugë të qytetit të Durrësit, mes të cilave dhe kjo rrugë e plazhit e cila ka një trafik të rënduar jo vetëm gjatë sezonit turistik.
Discussion about this post