Në tre qendra votimi të Bashkisë së Elbasanit, atje ku në 14 maj u votua dhe numërua elektronikisht, do të kryhet rinumërimi i votave. Vendimi është marrë nga KAS pas ankimimit të koalicionit Bashkë Fitojmë, që pretendon se në bashkitë ku u aplikua votimi elektronik ka pasur parregullsi.
Përfaqësuesit e koalicionit ‘Bashkë Fitojmë’ parashtruan pretendimet që sipas tyre janë shkelje të regjistruara gjatë procesit të votimit elektronik.
Përfaqësuesit e opozitës kanë ngritur pretendimin se ka një mospërputhje të votave të kandidatëve për kryetarë bashkie në total dhe atyre të këshilltarëve bashkiakë në total.
“Po të mbledhim votat për kryetar bashkie të dy kandidatëve plus votat e pavlefshme në total janë 65.612 sipas listës që ka paraqitur KQZ në listën përmbledhëse dhe përfundimtare ku është shpallur fitues kandidati i PS. Nëse mbledhim të gjithë votat e partive për këshillin bashkiak ka një numër prej 65.713. Pra ka një mos përputhje të numrit të votave dhe na lind dyshimi i arsyeshëm që në këto pajisje ka problematika”, u shprehën përfaqësuesit e koalicionit Berisha-Meta.
Përfaqësuesi i PS tha se diferenca e fitores në rezultatin për kryetar bashkie në Elbasan, është mbi 8 mijë vota, gjë që sipas tij nuk lë vend për ankimim.
Gjithsesi ditën e hënë do të rinumërohen 3 qendra votimi, proces që më shumë se ndikon në rezultat mund të hedhë dritë mbi pretendimet e ngritura që ditën e zgjedhjeve lidhur me pajisjet elektronike dhe manipulimin e tyre.
Discussion about this post