Gazetarja Klodiana Lala tha në emisionin “Të Paekspozuarit” se vendimi i sotëm i Apelit të GJKKO-së, duke lënë në burg Fredi Belerin dhe duke liruar me masën “detyrim paraqitje” Pandeli Kokaveshin, u bë sepse ky i fundit ka probleme të rënda shëndetësore që lidhen me një transplant zemre që ka bërë para 10 muajsh. Lala tha se prokuroria nuk ka asnjë element të shtuar ndaj kryetarit të zgjedhur të Himarës, Beleri dhe Kokaveshit, por prokuroria i ka qëndruar besnike versionit të parë, të akuzës për blerje votash për zgjedhjet vendore të 14 majit.
“Seanca e sotme zgjati dy orë dhe z. Beleri nuk ishte i pranishëm dhe u përfaqësua nga dy avokatë, që mbajtën të njëjtin qëdrim si më parë, duke mohuar që ai është përfshirë në blerjen e votave dhe ngritën edhe shqetësimin e problemit shëndetësor, sepse z. Beleri ndodhet në Spitalin e Burgjeve prej ditësh.
Prokuroria vazhdon t’i qëndrojë të njëjtit version se Beleri ka patur takime me të infiltruarin e policisë me inicialet A. R. dhe në këto takime është folur për shitblerjen e votës dhe z. Pandeli Kokaveshi ka dhënë një shumë prej 400 mijë lekësh të vjetra për 8 persona.
Gjykata nuk u bind nga argumentet që dhanë avokatët dhe la në fuqi vendimin e Gjykatës së Posaçme. Situata ka qenë e ndryshme për atë që cilësohet si organizatori Pandeli Kokaveshi. Gjykata e ka zbutur tërësisht masën e sigurisë nga arrest me burg, në detyrim paraqitje, pra hetimet do të vijojnë për të, por nuk mund të mbahej për arsye shëndetësore, sepse sipas avokatit, ka bërë transplant zemre dhe sipas ekspertëve gjendjen e tij duhet ta ndjekë mjeku që ka bërë transplantin. Duke parë të drejtën e jetës që prevalon mbi çdo të drejtë tjetër, gjykata ka vendosur për detyrim paraqitje.
Nuk ka asnjë element të shtuar dhe nuk e di se çfarë do të prodhojë hetimi, por prokuroria i ka qëndruar besnike versionit të parë”-tha Lala.
Discussion about this post