Situata te Paris Saint Germain nuk është dhe aq e lumtur sa duket në pamje të parë.
Pavarësisht titullit kampion të fituar, fundjavën e kaluar, sezoni, nga shumë opinionistë por edhe drejtues brenda klubit parisien, është cilësuar një dështim.
Eliminimi në fazën 1/8 të Champions League, përballë Bayern Munchen (pa shënuar asnjë gol), ka lënë një shije të hidhur te lojtarët e, mbi të gjitha, te tifozët.
Ultrasit e PSG nuk kanë kursyer kritikat e sharjet për yjet e skuadrës, me shënjestrën kryesore që ka qenë, argjentinasi Lionel Messi, i cilësuar si mercenar që nuk dha maksimumin për ekipin.
“Pleshti” e ka parë që ambienti në Paris, është i zymtë dhe ka vendosur, sipas raportimeve, që të mos qëndrojë më në Francë.
Largimi i tij ka bërë që të flitet për të ardhmen e tij, me Barcelonën që shihet si destinacioni i radhës i kampionit të botës me Argjentinën.
Përveç Messit që “thjesht” raportohet se do largohet, një tjetër lojtar, ndërkohë, i ardhur gjatë merkatos verore të 2021, ka konfirmuar se do të largohet nga PSG.
Ai është spanjolli Sergio Ramos, i cili ka postuar në Twitter se do t’i japë lamtumirën klubit rekordmen të Francës.
“Nesër është një ditë speciale, nesër do t’i jap lamtumirën një etape tjetër të jetës time, mirëupafshim PSG. Nuk e di se në sa vende dikush mund të ndjehet në shtëpi, por me pa dyshimin më të vogël PSG, fansat e klubit dhe qyteti i Parisit më kanë bërë të ndjehem si në shtëpinë time.”- deklaroi Ramos.
E ardhmja e mbrojtësit, nuk dihet, me shumë media që flasin për një rikthim në Spanjë, pa harruar interesimin e klubeve saudite./m.b /gijotina.com
Discussion about this post