Duke parë refuzimin e kryeministrit Kurti për t’iu bindur kërkesave të Departamentit të Shtetit, SHBA-ja ka vendosur që të rrisë nivelin e ndërhyrjes përmes Shtëpisë së Bardhë.
Zëvendësi i këshilltarit të Joe Biden për Siguri Kombëtare, Jon Finer ka telefonuar kryeministrin Kurti, për të folur rreth situatës dhe tensioneve në veri të vendit.
Finer në telefonatën me Kurtin ka nënvizuar shqetësimin e SHBA-së për situatën e tensionuar në veri të Kosovës dhe ka kërkuar nga të gjitha palët që të marrin hapa me qëllim të de-eskalimit të situatës.
Ai i ka bërë thirrje Qeverisë së Kosovës që t’ua mundësojë kryetarëve të rinj, të kryejnë detyrat e tyre nga objekte alterantive dhe që të largohen forcat policore nga objektet e komunave.
Siç thuhet në njoftimin e Shtëpisë së Bardhë, Finer ka mirëpritur gatishmërinë e Kurtit për të punuar drejt kushteve për zgjedhje të reja.
“Z. Finer përsëriti se Shtetet e Bashkuara presin që të dyja palët të riangazhohen në dialogun e lehtësuar nga BE, dhe të zbatojnë plotësisht marrëveshjen e normalizimit të arritur në Bruksel dhe Ohër në fillim të këtij viti”, thuhet në njoftim.
Discussion about this post