Kryeministri Edi Rama ka vijuar turin e falenderimeve në qytetin e Fierit. Ashtu si edhe në takimet e mëparshme, Rama nuk ka kursyer kritikat ndaj Kadastrës, që e konsideroi si portretin e turpit të qeverisë.
Madje, Kryeministri tha se dyert e Kadastrës do të mbyllen, pa qenë nevojë që qytetarët të takojnë asnjë regjistrues apo kryeregjistrues, por procesin mund ta bëjnë online.
“Edhe pse në një pjesë të madhe të shërbimeve kemi bërë një revolucion, duke i hequr radhët dhe zyrat, Kadastra është portreti i turpit tonë. Kjo është e vërteta dhe nëse nuk ia themi të tjerëve duket sikur jemi pajtuar me këtë të vërtetë. Por nuk mund të pajtohemi kurrë.
Kush mendon se është kredi me interesa të ulëta bën shumë gabim, është kredi me interesa të larta. Duhet të përmbysim… dhe jemi afër, të përmbysim rendin që mbizotëron në Kadastër. Njësoj siç kemi vepruar me shumë shërbime të tjera, po ashtu duhet të veprojmë. Duhet t’i mbyllim dyert e Kadastrave dhe shumë shpejt do ta bëjmë këtë gjë”, u shpreh kreu i qeverisë.
Pothuajse në çdo takim të zhvilluar pas 14 majit, Rama ka shigjetuar Kadastrën, që sipas tij ka future duart jo në njërin xhep, por në të dy xhepat e qytetarëve. Pak kohë më parë Kadastra ndryshoi drejtimin, ku Artan Lame u zëvendësua nga Dallëndyshe Bici. Lame drejtoi Kadastrën për 4 vite, ndërsa largimi i tij, herë u paraqit si dorëheqje dhe herë si një shkarkim.
Nuk dihet nëse akuzat që Kryeministri ka nisur të artikulojë kundër Kadastrës janë paralajmërime për ndonjë operacion që mund të çojë në arrestime, por në momentin që Bici mori detyrën, Rama paralajmëroi ngritjen e një Task Force që do të ushtronte kontrollet për atë që kishte ndodhur në këtë institucion.
Discussion about this post