Pas 90 minutave plot grintë, emocion, spektakël e gola, West Ham është shpallur fitues i Europa Conference League, falë fitores me rezultatin 2-1 përballë Fiorentinës.
Takimi i luajtur në kryeqytetin e Çekisë, Pragë, ishte i karakterizuar nga ekuilibri mes dy skuadrave, me mbrojtjet respektive që ishin protagoniste absolute gjatë pjesës së parë, e cila u mbyll 0-0.
Pjesa e parë, rezervoi dhe një episod negativ, kur mbrojtësi Biragi u godit në kokë me një shishe nga tifozët anglezë, të cilët i shkaktuan një plagë evidente në kokë.
Pjesa e dytë dhuroi dhe golat në këtë finale.
Fillimisht, “The Hammers” kaluan në avantazh, falë Benrahma, i cili në minutën e 62’ realizoi nga pika e bardhë e penalltisë.
Festa e tifozëve anglezë, megjithatë nuk zgjati shumë, prej faktit se Bonaventura i Fiorentinës, rivendosi baraspeshën në minutën e 67’.
Të dyja skuadrat, kishin dëshirë që të mbyllnin llogaritë brenda kohës së rregullt, me West Ham që ia arriti qëllimit në minutën e 90’ me Bowen që mposhti portierin e Fiorentinës, duke i dhënë kështu fitoren si dhe trofeun e parë të Conference League, West Hamit.
Me këtë sukses londinezët, kualifikohen në Europa League, si fitues të kompeticionit.
Për Fiorentinën, kjo është finalja e dytë e humbur brenda pak ditësh, pas finales së Kupës së Italisë. Kjo humbje e la ekipin toskan jashtë kupave të Europës./m.b /gijotina.com
Discussion about this post