Fitorja e West Ham United, në finalen e Conference League përballë Fiorentinës, me rezultatin 2-1, është historike për shumë arsye.
Triumfi në stadiumin Eden Park të Pragës, është i pari i një skuadre angleze në kompeticionin e tretë, për nga rëndësia, të UEFA-s.
Ndërkohë, përsa i përket vetë klubit të West Ham, kryeqytetasit kanë fituar trofeun e parë kontinental pas Kupës së Kupave, të fituar në vitin 1965 (pa llogaritur Kupën Intertoto, në vitin 1999).
Rekord ka vendosur, gjithashtu një futbollist i “çekanëve”. Italiani Emerson Palmieri është bërë i pari lojtar që ka fituar të gjithë turnetë aktivë të UEFA-s për klube dhe kombëtare (UEFA Champions League, UEFA Super Cup, UEFA Europa League, UEFA Europa Conference League, Kampionati Europian).
Palmieri, ka fituar në 2019, Europa League me Chelsea, klub me të cilin triumfoi gjithashtu në UEFA Champions League dhe UEFA Super Cup, në vitin 2021.
Me kombëtaren e Italisë, mbrojtësi me origjinë braziliane, fitoi Kampionatin Europian (UEFA Euro 2020), duke triumfuar në Wembley, përballë Anglisë pas serisë së 11-metërshave.
Me triumfin në Pragë, ai është tashmë mbajtësi i këtij rekordi unik./m.b /gijotina.com
Discussion about this post