Avokat Spartak Ngjela tha në studion e News24 se SPAK nuk e arrestoi Vangjush Dakon para zgjedhjeve, pasi mund të ndikonte një veprim i tillë në rezultatin zgjedhor.
“Janë kryetar bashkish të mëdha. Hap pas hapi po provohet një korrupsion i madh në Shqipëri. Sa më e madhe bashkia aq më i madh korrupsioni. Dako ndërkohë nuk është kryetar bashkie, por ka qenë. Me të dyja akuzat, ajo e falsifikimit mban brenda diçka më shumë se falsifikimi në rast se provohet”, tha Ngjela.
Sipas tij, akuzat, a kanë lidhje edhe me një përftim monetar të kryetarit të Bashkisë në funksion të shkeljeve, mbetet për t’u provuar. “Arrest shtëpie nuk mund të jepet dot sepse janë dy vepra penale për të cilat hetimi nuk dihet se si mund të shkojë”, është shprehur Ngjela.
Ai tha se Dako ishte imazhi i Partisë Socialiste në Durrës, bashkinë e dytë më të madhe në vend, dhe mendoj se SPAK i është ruajtur pikërisht momentit që arrestimi i ish-kryebashkiakut mund të vendoste përballë Prokurorisë Speciale, Partinë Socialiste.
“Mund të kishte ndikim në zgjedhje, ndaj mendoj se nuk u bë më parë arrestimi i dakos. Ndoshta arrestimi mund të ndikonte që PS të humbiste zgjedhjet në Durrës, atëherë do të kishim akuza të socialistëve ndaj SPAK. Kësaj i është druajtur Prokuroria Speciale dhe vendosi që ta arrestojë pas zgjedhjeve”, tha Ngjela.
Por sipas tij, fakti që Rama e konsideron Dakon një mik të tij dhe SPAK e arreston, tregon se Prokuroria Speciale nuk është nën ndikimin apo ndërhyrjen e Kryeministrit, sikundër e ka akuzuar opozita.
Ngjela tha se SPAK me arrestimin e Dakos tregoi se nuk pyet Ramën, dhe as Rama nuk ka ndikim te Prokuroria Speciale.
“Fakti që ky deklarohet si mik i afërt i Ramës vjen një moment që akuza e arreston. Rama po të kishte forcë nuk e arrestonin. Kjo tregon që SPAK nuk ka lidhje me Ramën”, tha ai.
Discussion about this post