Katër persona kanë rënë në prangat e policisë së Sarandës, pasi akuzohen se kanë ndihmuar disa sirianë për të kaluar ilegalisht në vendet e BE, kundrejt pagesës. Në pranga kanë rënë Edmont Doda, Kleo Muça, Edelson Selimaj dhe Klodian Rexha.
Mësohet se, këta persona në bashkëpunim me njëri-tjetrin, kishin marrë në Konispol, në afërsi të kufirit të gjelbër me shtetin grek, 6 sirianë që kishin hyrë në mënyrë të parregullt në vendin tonë, me qëllim transportimin e tyre në drejtim të Tiranës, kundrejt pagesës 300 euro, me destinacion final vendet e BE.
Në cilësinë e provës materiale janë sekuestruar dy automjete të marra me qira në Tiranë, 6 aparate celulare dhe një shumë parash.
Materialet për hetime të mëtejshme i kaluan Prokurorisë pranë Gjykatës së Shkallës së Parë Sarandë, për veprën penale “Ndihma për kalim të paligjshëm të kufijve” kryer në bashkëpunim.
Discussion about this post