Nano merr mbështetjen e deputetëve të PD/ “Ndihem i llastuar”

Gazetari Mustafa Nano u propozua nga Qeveria si ambasador i Shqipërisë në Zvicër. Nano ishte sot në Komisionin parlamentar për Politikën e Jashtme, ku ka shpalosur platformën e tij.

E veçanta në këtë seancë ishte se pro kandidaturës së Nanos janë shprehur edhe deputetët demokratë Kreshnik Çollaku dhe Agron Gjekmarkaj. Duket se qëndrimi i dy deputetëve të PD nuk ka befasuar kandidatin për ambasador, i cili nuk ka nguruar të shprehet se ndihej i llastuar dhe i ledhatuar që po pritej mirë.

Debatet

Mustafa Nano: Do doja të ishte një moment i veçantë në jetën time. Shpresoj që puna të jetë interesante. Në Zvicër ka një rreth të madh shqiptarësh. Do mbaj fokus të veçantë te detyra ime.

Unë kam vendosur të jem më aktiv se ambasadorët e tjerë në botë. Unë do doja të isha më aktiv. Do doja që roli i ambasadorit të ishte më i madh. Do kuroj marrëdhëniet mes Shqipërisë dhe Zvicrës.

Kreshnik Çollaku: Më vjen mirë që vuri theksin te diaspora. E nxis dhe me entuziazmoi dëshira për këtë risi në diasporë. Me keqardhjen e madhe që Tiranës do t’i mungojë një studio ku ne flasim.

Agron Gjekmarkaj: Jemi munduar që Zvicrës t’i gjejmë ambasadorë të qetë. Duhet t’i kishim marrëdhëniet me cilësore, ndoshta duke dërguar atje një zhurmues do ketë ndryshim.

Më vjen mirë që kemi ambasador dikë që ka shkruar libra. Shpresoj që Shqipëria të fitojë një ambasador cilësor. Besoj se ai është njeri i lirë dhe do jetë shërbëtor cilësor i vendit tonë.

Mustafa Nano: Ndihem i ledhatuar dhe i llastuar që po pritem mirë. Nuk kisha dyshime.