Frika se numri i të vdekurve nga mbytja e anijes së peshkimit me emigrantë do të rritet, u konfirmua nga të dhënat e fundit pak para orës 13:00, pasi numri i viktimave tani është 59 nga 17 që u deklaruan më parë.
Sipas informacioneve, emigrantët – 104 prej të cilëve janë shpëtuar – të cilët ndodheshin në bordin e anijes së peshkimit që u mbyt në rrethana të paqarta deri më tani, ishin nga Afganistani, Pakistani, Siria dhe Palestina.
Të njëjtat informacione thonë se anija e cila ishte nisur nga Tobruku i Libisë, ka lundruar për pesë ditë në mot të mirë derisa ka arritur në pikën ku është fundosur.
Sipas mediave greke, emigrantët që ndodheshin në anijen e peshkimit nuk dinin të notonin, ndërsa asnjë nga të shpëtuarit nuk kishte sjellë jelek shpëtimi.
Ajo që ka bërë përshtypje është se si trafikantët e çuan mjetin lundrues në pjesën më të thellë të Mesdheut kur u mbyt, ndërkohë që zona nuk është në rrugën e zakonshme për në Itali.
Dëshmitë raportojnë se ndërsa anija po lundronte, papritmas pati një tronditje majtas dhe më pas djathtas dhe pasoi me fundosjen e anijes së peshkimit.
Ngjarje të ngjashme nga e kaluara kanë treguar se goditje të tilla shkaktohen nga përleshjet midis banorëve që rezultojnë në zhvendosje të ngarkesës.
Këto dëshmi, në fakt, ngrenë dyshime për mundësinë që kontrabandistët e emigrantëve t’i kishin mbyllur emigrantët në gropa për të pasur kontrollin e plotë të varkës.
Anija e peshkimit ishte nisur nga Tobruku, Libi me destinacion Italinë dhe u pa për herë të parë rreth orës 20:00 të së martës.
Në atë moment ajo u afrua nga një varkë e Frontex dhe gjithashtu nga roja bregdetare dhe iu ofrua ndihmë emigrantëve pasi anija ishte plot, siç u konstatua edhe nga një dron i Frontex që fluturoi në vendngjarje.
Sipas informacioneve, personat në bord kanë refuzuar ndihmën e ofruar dhe kanë deklaruar se duan të vazhdojnë udhëtimin drejt Italisë.
Megjithatë, disa orë më vonë dhe në kushte të paqarta deri më tani, anija u përmbys dhe u fundos pas mesnate.
Zyrtarët e Rojës Bregdetare vlerësojnë se numri i incidenteve të tilla do të rritet, pasi shtohet numri i emigrantëve që, qoftë nga brigjet turke, qoftë nga Afrika e Veriut, udhëtojnë kryesisht drejt Italisë për t’u nisur më lehtë drejt Europës Qendrore dhe Veriore.
Varkat janë të vjetra dhe shumë prej tyre nuk janë mirëmbajtur, ndërsa numri i pasagjerëve është shumë më i lartë se sa lejohet.
Discussion about this post