Diabeti mund të jetë një sëmundje shumë e hasur, por nga ana tjetër, është edhe e keqkuptuar, pasi rreth kësaj sëmundjeje qarkullojnë mite të shumta. Sot po ‘thyejmë’ 8 prej tyre.
Diabeti shkaktohet nga konsumimi i sheqerit
Sheqeri vetë nuk shkakton diabet në mënyrë direkte. Sigurisht që nëse e kalon masën do të kesh probleme me mbipeshën dhe obezitetin, që janë dy faktorë që shkaktojnë për diabetin e tipit 2. Ky është një mit shumë i përhapur dhe është e kuptueshme- sepse niveli i rritur i sheqerit në gjak luan rol thelbësor. Vetë sheqeri, nuk është shkaktar i sëmundjes.
Dieta e duhur e diabetikëve është shumë e limituar
Kjo nuk është aspak e vërtetë. Ti mund të konsumosh gjithçka, e vetmja gjë për të cilën duhet të jesh i/e vëmendshëm, është sasia që do të marrësh. Të kesh diabetin e tipit 2, nuk do të thotë të heqësh dorë nga ushqimet që do të hash. Thjesht duhet t’i marrësh ato në masën e duhur dhe t’i kombinosh në mënyrë të shëndetshme.
S’do të mund të ha kurrë ëmbëlsira
Sigurisht që mundesh. Në momentin që ti do të familjarizoheni me dietën që ndjek për të mbajtur nën kontroll diabetin, do ta shohësh që një ëmbëlsirë më shumë nuk do të përbëjë asnjë lloj rreziku për shëndetin. Mjekët rekomandojnë ngrënien e porcioneve të vogla ose ngrënien e ëmbëlsirave në raste speciale.
Mund të ha vetëm ushqime për diabetikët
Nuk ka asnjë ushqim special për diabetikët, mos ia thuaj më vetes këtë. Dieta ideale e diabetit është gjithashtu dieta më e shëndetshme për të gjithë, që përfshin proteinat, frutat dhe perimet. Ndryshimi i vetëm është masa!
Nëse tregohesh strikt me dietën, diabeti do të zhduket
Një dietë e shëndetshme ushqimore nuk e shëron diabetin, thjesht e mban atë nën kontroll. Nëse ti ke diabetin e tipit 2, insulina që prodhon trupi yt, nuk funksionon siç duhet për të zhvendosur glukozën që merr nga ushqimet në qelizat e tua, ku do të përdoret për energji. Kjo shkakton rritjen e sheqerit në gjak dhe një dietë e shëndetshme nuk mundet ta shërojë përfundimisht atë, pasi diabeti është sëmundje kronike, por e sigurt është që do të mund ta mbash nën kontroll dhe do të shmangësh komplikimet.
Frutat janë të shëndetshme, mund të konsumoj sa të dua
Frutat përmbajnë karbohidrate, kështu që ju duhet t’i llogarisësh ato me kujdes. Frutat janë burim i mirë vitaminash, mineralesh dhe fibrash, element të cilët duhet patjetër të jenë në dietën tënde, por nëse do t’i konsumosh pa kriter, rreziku që situata të dalë jashtë kontrollit, është më i madh.
Përderisa mbaj ilaçe, pse duhet të mbaj dietë?
Këtu gabojnë të gjithë. Mendimi se ilaçi është gjithçka duhet për të mbajtur diabetin nën kontroll bën që shumë njerëz të abuzojnë me dietën ushqimore dhe dihet në fund rezultati. Për të shmangur çdo lloj komplikimi duhet patjetër që në stilin e jetesës të jetë një ushqim i shëndetshëm dhe aktivitet fizik i vazhdueshëm. Nëse nuk i bën këto, sheqeri në gjak do të vazhdojë të rritet, pavarësisht dozës së ilaçeve që merr zakonisht.
Obeziteti shkakton gjithnjë diabet
Obeziteti rrit shanset për diabet, por jo domosdoshmërisht të çon drejt kësaj sëmundjeje./SHQIP
Discussion about this post