Zbardhet vendimi, OJF-të e fshatit kalojnë në varësi të Ministrisë së Bujqësisë

Në mbledhjen e ditës së sotme Këshilli i Ministrave ka vendosur të bëjë disa ndryshime në projektligjin “Për organizimin dhe funksionimin e grupeve vendore të veprimit”, duke përcaktuar rregulla të reja për regjistrimin dhe veprimtarinë e tyre. Ndërkaq ajo që bie në sy është se përmes këtyre ndryshimeve, OJF-të në fshatra do të kalojnë tërësisht nën varësinë e Ministrisë së Bujqësisë. Në këtë vendim përcaktohet se OJF-të do të raportojnë për çdo të dhënë, për çdo hap pranë ministrisë. Madje dhe vlerësimi dhe regjistrimi i tyre më pas do të bëhet direkt nga ministria.

Pra do të jetë Ministria e Bujqësisë ajo që do të vendos nëse këto OJF plotësojnë kriteret, pa ndërhyrjen e bashkive apo institucioneve të tjera. “Çdo GVV, para fillimit të ushtrimit të aktivitetit, sipas parashikimeve të këtij ligji dhe akteve nënligjore, pajiset me autorizim nga ministri. GVV-të e regjistruara në regjistër raportojnë pranë strukturës përgjegjëse në ministri, të përcaktuar sipas pikës 16, të nenit 3, të këtij ligji. Struktura përgjegjëse pranë ministrisë vlerëson aktivitetin e GVV-ve dhe përmbushjen nga ana e tyre të parimeve e të kritereve të këtij ligji dhe do t’u ofrojë atyre sugjerime/rekomandime, kur i konsideron të nevojshme”, thuhet në projektligj.

Gjithashtu, bëhet me dije se do të jetë Ministria e Bujqësisë ajo që do të vendose për rregullat që do duhet të ndjekin këto JOF. Madje, ministria do mund të ndërhyjë në rregulloren e brendshme të tyre, si dhe herë pas herë do të ushtrojë auditim mbi ecurinë e tyre. “Pranë ministrisë krijohet dhe mbahet regjistri i GVV-ve, sipas modelit të miratuar me urdhër të ministrit. Regjistri do të identifikojë GVV-të për çdo zonë, duke ofruar të dhëna për: zonën “LEADER”, ku funksionon GVV-ja; strukturën e GVV-së; statutin dhe aktin e themelimit të GVV-së; rregulloren e brendshme të GVV-së; aktivitetet vjetore të GVV-së; auditin dhe raportimin në GVV; autorizimin; urdhrin e shfuqizimit të autorizimit”, përcakton vendimi. Në përfundim thuhet se, ministri mund të kthejë për rishqyrtim strategjinë e miratuar nga Asambleja për ecurinë e një OJF-je.