Policia e Shtetit ditën e ndjeshme zbarkoi në kampin e MEK në Manzë, bazuar në një vendim të GJKKO-së, e cila miratonte kërkesën e SPAK për të kontrolluar kampin ku qëndrojnë muxhahedinët iranianë.
Ndërhyrja e policisë u shoqërua me përplasje, ndërsa një person humbi jetën në rrethana ende të paqarta dhe shumë të tjerë mbetën të lënduar. Gjithashtu edhe nga forcat e rendit pati lëndime, ndërsa reagimi i anëtarëve të MEK u konsiderua i papranueshëm nga Ministria e Brendshme dhe Policia e Shtetit.
Ndërsa kanë nisur hetimet lidhur me ngjarjet e ndodhura në kampin e MEK, ku 6 prej drejtuesve të muxhahedinëve janë nën hetim lidhur me aktet e dhunës, janë zbardhur detaje nga dosja e SPAK që urdhëronte kontrollin në mjediset e kampit.
Policia bllokoi dje një seri pajisjesh elektronike dhe serverash, që dyshohet se janë përdorur në sulme kibernetike në drejtim të Republikës Islamike të Iranit. Këto pajisje do i nënshtrohen ekspertizës, ndërsa SPAK vijon hetimet.
“Është referuar fakti se dyshohet se nga organizata “MEK” (Organizata e Muxhahedinëve të Popullit të Iranit) nga territori i Republikës së Shqipërisë ka kryer sulme kibernetike ndaj Republikës Islamike të Iranit në disa periudha të ndryshme kohore si dhe drejt disa institucioneve në shtetin iranian. Duke qenë se statusi i qëndrimit të organizatës MEK në Shqipëri është humanitar, Republika Islamike e Iranit në vazhdimësi ka pretenduar duke ngritur këto dyshime si dhe në mënyrë të vazhdueshme kërcënon se do të ndërmarrë sulme ndaj Shqipërisë dhe organizatës MEK”, thuhet në vendimin e Gjykatës, sipas raportimeve mediatike.
Ndërhyrja e Policisë së Shtetit në kampin e MEK ka sjellë reagime të shumta. Opozita e drejtuar nga Sali Berisha e ka cilësuar si brutale deri në kufinjtë e një terrori veprimin e policisë, ndërsa ka kërkuar hetim ndërkombëtar. Kreu i demokratëve Sali Berisha tha se hetimi duhet të kryhet nga OKB.
Ndërkohë, Departamenti Amerikan i Shtetit e ka përkrahur aksionin policor të Shqipërisë më 20 qershor, kur Policia e Shtetit kreu kontrolle në kampin e Manzës së Durrësit, ku janë të strehuar rreth 3.000 pjesëtarë të opozitës iraniane.
Drejtori i Përgjithshëm i Policisë së Shtetit, Muhamet Rrumbullaku, ka konfirmuar se gjatë këtij aksioni ishin lënduar 15 zyrtarë policorë dhe 21 anëtarë të Organizatës së Muxhahedinëve të Popullit të Iranit (MEK).
“Policia e Shtetit në Shqipëri na ka siguruar se të gjitha veprimet janë kryer në përputhje me ligjet në fuqi, përfshirë mbrojtjen e të drejtave dhe lirive të të gjithë personave në Shqipëri. Ne mbështesim të drejtën e Qeverisë së Shqipërisë për të hetuar çdo veprimtari të mundshme të paligjshme brenda territorit të saj”, ka thënë një zëdhënës i Departamentit amerikan të Shtetit.
Zëdhënësi i DASH-it gjithashtu shtoi se SHBA-ja nuk e cilëson MEK-un “lëvizje opozitare të qëndrueshme demokratike që përfaqëson popullin iranian”, por ka “shqetësime serioze për MEK-un si organizatë, përfshirë akuzat për abuzim të kryera kundër anëtarëve të tij”.
Por po nga SHBA, senatori Ted Cruz ka shprehur kritika lidhur me ndërhyrjen. Sipas Ted Cruz, Franca dhe Shqipëria po qetësojnë regjimin iranian duke goditur disidentët e regjimit.
“Jam thellësisht i shqetësuar se në të gjithë Europën- dhe veçanërisht tani, Franca dhe Shqipëria- aleatët tanë po qetësojnë regjimin iranian duke goditur disidentët kundër regjimit.
Sipas raportimeve, administrata e Biden po i mbështet këto politika pro-regjimit, ndërkohë që mbështet drejtpërdrejt regjimin duke i dërguar Ajatollahut qindra miliarda dollarë dhe duke duke nxitur lirimin e terroristëve.
Goditjet dhe zbutja do të inkurajojnë dhe do t’i mundësojnë regjimit iranian të kryejë më shumë terrorizëm global. Ata përbëjnë kërcënim direkt për sigurinë e amerikanëve,” shkruan Cruz.
Discussion about this post