Të shtunën Kosova u përfshi nga shirat e rrëmbyeshëm, por më së shumti u prek qyteti i Pejës.
Vërshimet kanë shkaktuar edhe vdekjen e një djali dhjetëvjeçar të lindur në vitin 2013, përveç dëmeve të shumta materiale në ekonomi familjare, biznese dhe bujqësi.
Nëna rreth 30-vjeçare së bashku me fëmijën e saj të vetëm 5-vjeçar, në momentet kritike ishin duke qëndruar në shtëpi në lagjen “Asllan Çeshme” në Pejë.
Familjari i viktimave, Albert Ademaj, akuzoi institucionet që nuk i dolën në ndihmë.
Derisa tregoi rastin, Ademaj tha se edhe trupin e pajetë e dërguan vetë në ambulancë.
“Veç Policia kanë qenë, më vonë ka ardhur prokurorja e rastit edhe një shpëtimtar ka qenë. Një polic nuk është sjellë aspak mirë me do gjeste tmerr…Unë duke e nxjerrë trupin, ai thoshte mos e prek, leje aty. As nuk më ka ndihmuar, si qytetar të më ofrojë përkrahje më të mirë, por me atë sjellje të “rrugaçit” nuk di.
Me pas e kemi thirrur ambulancën dhe më pas e kemi mbajt me dorë djalin, sepse rruga ka qenë e pakalueshme. Kemi shkuar poshtë dhe aty kemi menduar që është duke ardhur ambulanca, nuk kish qenë për ne, por për një polic që është rrëzuar dhe ka thyer krahun.
Pyeta ku është ambulanca të çojmë për në spital, ndërsa përgjigjja e tyre ishte që nuk kanë qenë të informuar për këtë rast dhe nuk mundemi me e marrë, sepse kemi ardhur për lëndim të krahut të një polici”, tha Ademaj./Telegrafi
Discussion about this post