Pavarësisht se është 40 vjeç, Fernando Alonso ka treguar se dëshiron të vazhdojë aventurën e tij në garat e Formula 1. Spanjolli është shprehur edhe për titullin e tretë të mundshëm të kampionit të botës.
Spanjolli ka treguar se ai ka ende shumë për të dhënë, siç e dëshmoi edhe në garën e fundit ku mori vendin e tretë në Grand Prix-in e Katarit.
Pasi është shpallur kampion bote në vitin 2005 dhe 2006, Fernando Alonso nuk e fshehu dëshirën që edhe një herë të dëshironte të prekte majat me ekipin e tij të Alpine.
“Kam në plan të qëndroj të paktën edhe dy ose tre vjet“-tha ai, ndërsa më tej shtoi: “Po, do të qëndroj. Edhe pse makina nuk është aq e mirë, kam në plan të qëndroj të paktën edhe dy ose tre vjet. Titulli i tretë? Do të ishte shumë, kjo është e sigurt. Por nuk është se dua dëshpërimisht ta kem atë, nuk do të ndryshojë të gjithë karrierën time apo mënyrën se si e shoh F1. Unë jam konkurrues në çdo gjë që bëj. E pres me shumë padurim kampionatin e tretë dhe do të bëj gjithçka që mundem dhe më shumë në vitet në vijim. Do të thoshte shumë për sa i përket trashëgimisë, pas përfundimit të karrierës sime në Formula 1, të tregoja se gjithmonë duhet të sulmosh deri në kufi, të përpiqesh të gjesh përsosmëri në gjërat që bën, të jesh shumë i disiplinuar në mënyrën se përgatitesh. Nuk ka rëndësi nëse je 19, 42 apo 43 vjeç, është një mënyrë jetese. Duhet t’i përkushtohesh plotësisht këtij sporti. Ndoshta do të jetë gjëja kryesore nëse fitoj këtë titull të tretë, këtë lloj trashëgimie dhe mesazhi për brezat e ardhshëm. ”,- tha Fernando Alonso, në komentet e raportuara nga Motorsport./K.T/Gijotina.com
Discussion about this post