Përplasjet në PD zyrtare, Nallbati paralajmëron Bashën: Do shihemi në Gjykatë nëse…

Deputeti i Partisë Demokratike, Bledion Nallbati, është shprehur se një rikonfirmim i ish-kryedemokratit Lulzim Basha në krye të PD-së, është jolegjitim dhe jo-statutor.

Nallbati tha se lidhur me vendimmarrjet që sipas tij janë jo legjitime brenda disa strukturave të PD-së, ata mund të shkojnë deri në gjykatë.

Në një intervistë për Panorama TV, Nallbati vuri në dukje gjithashtu divergjencat dhe dhunën verbale që ndodhi para disa ditësh gjatë mbledhjes së grupit parlamentar të PD, që sipas tij ishte e papranueshme.

“Ne kemi deklaruar që mbledhja e Këshillit Kombëtar është jo legjitime sepse nuk arriti kuorumin  e nevojshëm për ty mbledhur. Ishin 175 persona, ndërkohë që Këshilli ka 453 anëtare, që do të thotë se nuk plotësohet kuorumi.

Që në momentin që nuk ka kuorum nuk ka vendimmarrje. Edhe për vendimmarrjen nuk jemi dakord dhe e kemi thënë, prandaj ajo u organizua në atë formë, ku një numër nuk u njoftuan për të qenë pjesë e këtij Këshilli, ose u deklaruan që nuk janë më pjesë e këtij Këshilli. Nga 453 ata deklaruan që Këshilli ka 329 anëtarë, por janë larguar shumë anëtarë”, tha ai.

Deputeti demokrat u shpreh se e gjithë kjo kohë, por edhe rezultati në 14 maj, tregoi nevojën e bashkimit të PD, por nuk janë marrë hapat e duhura.

“Kjo nuk do të thotë që nga ne bien poshtë ato që kemi thënë. E kemi thënë që me Berishën në krye nuk mund të marrim pushtet, por kjo nuk do të thotë që të mos bëjmë përpjekje për të bashkuar PD. Sepse po funksionojmë si grupime të ndara”, tha ai.

Nallbati paralajmëroi se nëse është e nevojshme, patjetër do t’i drejtohen Gjykatës, lidhur me zhvillimet e fundit në rradhët e PD-së zyrtare.

“ Nuk mund të pranojmë që për interesa të disa individëve , PD të kthehet si partitë tjera, pa anëtarë dhe pa votues.

Nëse Lulzim Basha vijon me një proces të tillë, duke mos marrë në konsideratë do të kthehet në parti të tillë.

Zgjedhje mund të bëjë kushdo, ne nuk do t’i njohim. Kemi marrë kontakt me anëtarët e Këshillit Kombëtar të PD për të marrë mendimin e tyre. Ata janë 453 anëtarë, kemi filluar të kontaktojmë, do të marrim vullnetin e tyre dhe nëse ka një vullnet të kundërt do të ketë një vendimmarrje të Këshillit”, tha ai.