Shpërthim në oborrin e objektit komunal në veri të Mitrovicës, dëmtohen dy vetura të Policisë
Policia e Kosovës ka bërë të ditur se të hënën në orët e vona të mbrëmjes nga persona të dyshuar është sulmuar me mjet shpërthyes komuna në Veri të Mitrovicës.
Lajmin e konfirmoi zëdhënësi i Policisë së Kosovës, Baki Kelani.
“Më datën 26.06.2023, në orët e vona të mbrëmjes nga persona të dyshuar është sulmuar me mjete shpërthyes Komuna në Veri të Mitrovicës.
Bazuar në informatat zyrtare dyshohet se në oborrin e objektit komunal në Mitrovicë Veri, afër hyrjes së objektit është hedhur një mjet shpërthyes, që dyshohet të ketë qenë granatë dore. Nga shpërthimi janë shkaktuar disa dëme materiale në makinat zyrtare”, tha Kelani.
Ai tha se nuk raportohet për lëndime në njerëz, përveç dëmeve materiale të shkaktuara në dy vetura zyrtare të policisë.
Kujtojmë se shpërthimet vijnë pas lirimit të tre policëve të Kosovës gjatë ditës së djeshme.
Ndërsa zyrtarët serbë theksuan që do të luftojnë për lirimin e të arrestuarve serbë në Kosovë të cilët sipas tyre janë vënë në pranga pa asnjë provë gjyqësore, pavarësisht se disa prej të arrestuarve njihen për krimet e kryera në veri të vendit dhe sulmet ndaj KFOR-it në datë 29 maj.
Discussion about this post