Krerët e Kosovës urojnë për Kurban Bajram: Të zgjasim dorën e mirësisë

Presidentja e Kosovës, Vjosa Osmani ka uruar qytetarët për festën e Kurban Bajramit.

Osmani shkruan se kjo festë është një mundësi e mirë për të çmuar lidhjet familjare e miqësore si dhe për të zgjatur dorën e mirësisë ndaj atyre në nevojë.

“Kurban Bajrami është mundësi reflektimi mbi solidaritetin, sakrificën e tolerancën. Është mundësi për t’i çmuar lidhjet tona familjare dhe miqësore, si dhe për të zgjatur dorën e mirësisë ndaj atyre në nevojë.

Derisa sot mblidhemi së bashku për të festuar, le të kujtojmë frymën e unitetit dhe harmonisë që simbolizon kjo festë. Me shpresën që kjo festë të sjellë te ju, familjet dhe të afërmit tuaj të mira e begati, ju uroj edhe një herë me fat Kurban Bajramin”, shkruan Osmani.

Edhe kryeministri, Albin Kurti ka uruar qytetarët për festën e Kurban Bajramit.

Kurti në një postim në Facebook shkruan se në festë e sakrificës të bëhemi edhe më solidarë e më zemërgjerë me të tjerët.

“Sakrifica gjithmonë ka për synim tjetrin, jo veten. Të mirën e përgjithshme, jo të mirat vetanake. Ajo është shërbim dhe përkushtim, që nganjëherë të pakëson, por gjithmonë të lartëson.

Përmes saj heq dorë nga të qenit në qendër, për t’u bërë qendra e të tjerëve.

Në festën e sakrificës, le të bëhemi edhe më solidarë e më zemërgjerë me të tjerët, për të mirën e përgjithshme, me ata që na rrethojnë. Sot, nesër, çdo ditë të vitit”, shkruan Kurti.