Janë luajtur mbrëmjen e sotme (e mërkurë), edhe dy takimet e fundit, të fazës në grupe, të Kampionatit Europian U21, që po zhvillohet në Rumani dhe Gjeorgji.
Në ndeshjet e grupit D, nuk kanë munguar dramat, me rezultate që kanë shkaktuar, deri diku, surpriza.
Në takimin mes Francës dhe Zvicrës, “Gjelat”, bënë detyrën, duke triumfuar ndaj helvetikëve, me rezultatin 4-1.
Rezultati i kësaj sfide u zhbllokua nga Guiri në minutën e 16’, me një 11-metërsh.
Franca krijoi shumë mundësi të tjera, për të dyfishuar rezultatin, megjithatë “Les Bleus” dukej, se nuk donin të shkaktonin shumë dëme, ndaj kundërshtarit, edhe prej faktit se e kishin siguruar biletën e çerekfinales, që në takimin e dytë, ndaj Norvegjisë.
Nga një amnezi, në mbrojtjen e Francës, erdhi barazimi i Zvicrës. Në minutën e 35’, Ndoye goditi saktë duke rivendosur baraspeshën. Me shifrat 1-1, u mbyll pjesa e parë.
Në pjesën e dytë, Franca zbriti në fushë, më e etur se kundërshtari, për të bërë mirë.
Sulmet e bluve ishin të rrezikshme, me Zvicrën që filloi të haste vështirësi.
Në minutën e 65’, Barcola dërgoi topin në rrjetë, për t’i dhënë, përsëri, epërsinë Francës.
Zvicra, filloi të ndjente lodhjen në 20 minutat e fundit, me Francën që trefishoi shifrat, me Cherki, në minutën 76’.
Vuajtja, nuk mori fund këtu, sepse në minutën e 81’, erdhi dhe goli i katërt i francezëve, me autor Max Caqueret.
Me këtë fitore, Franca konfirmoi vendin e parë me pikë të plota në grup.
Fitorja e “Gjelave”, nuk ndikoi aspak në fatin e Zvicrës, e cila u kualifikua gjithashtu, në çerekfinale. Kjo për faktin se Italia, në takimin e saj, përballë Norvegjisë, u mposht, në mënyrë surprizë, me shifrat 1-0.
Goli i nordikëve, i realizuar nga Botheim, në minutën e 63’, eliminoi ekipin “e kaltër” nga turneu.
Discussion about this post