Futbollisti i talentuar, Takefusa Kubo është një nga yjet më të mëdhenj që ka nxjerrë “Sol Levante” vitet e fundit. 22-vjeçari u transferua si lojtar i lirë nga FC Tokyo te Real Madrid në verën e vitit 2019.
Më pas nisi “kalvari” i huazimeve. Në fillim te Real Mallorca, më pas te Villareal dhe Getafe. Me sulmuesin e djathtë që nuk ia doli në asnjë moment të debutonte me “Los Blancos”, në takime zyrtare.
Reali e shiti verën e vitit të kaluar te Real Sociedad për 6.5 milionë euro. Kubo shënoi 9 gola dhe regjistroi 7 asistime, duke dhënë kontribut të madh në kualifikimin e bardhebluve në Champions League.
Napoli kërkon ta sjellë në Serie A, ndërkohë që talenti aziatik ka përfunduar edhe në radarin e sheikëve nga Arabia Saudite.
Drejtuesit e Al-Hilalit të Riadit i propozuan një kontratë 4-vjeçare me 40 milionë euro pagë sezonale. Ofertë e çmendur, por që është refuzuar nga Kubo.
Gazeta e njohur spanjolle “AS” raporton se lojtari nuk dëshiron të largohet nga Real Sociedad, pasi preferon të aktivizohet në grupet e Champions League sezonin e ardhshëm.
Kubo numëron edhe 25 ndeshje me kombëtaren e Japonisë. Gjatë së cilave ka gjetur dy herë rrugën e rrjetës.
Discussion about this post