Në dhjetor të vitit të kaluar, gjatë prezantimit të projektit për portin e ri tregëtar të Durrësit, Edi Rama, bëri një deklaratë që në atë kohë kaloi pa shumë vëmendje.
‘Në Europë çfarë ishte për t’u bërë në kuptimin e porteve është bërë, ky është një port me një rendësi të madhe strategjike për ekonominë dhe sigurinë. Porti ka pranë edhe një zonë ekonomike për rreth 60 hektarë, që ka interesin e vet nga pikëpamja përpunimit. Kështu nëse Anglia na bën ndonje propozim për te krijuar së bashku ndonjë situatë që mund të mos i pëlqejë BE por është e rëndësishme për të dyja palët, ne mund të brexitojmë një zonë dhe të vendosim një flamur anglez, të vendosim gjykatat angleze që te vendosin për konfliktet mes aktorëve, si në Dubai,’ deklaroi Rama.
Pak muaj para kësaj deklarate, Edi Rama kishte pritur në zyrën e tij, kryebashkiakun e Tees Valleyt në Britani. Deklarimi i Ramës dhe vizita e kryebashkiakut nuk janë pa lidhje me njëra tjetrën.
Një burim konfidencial i tha Oligarkia.al se një nga qëllimet kryesore të vizitës së Houchen në Shqipëri ishte pikërisht Porti Tregëtar i Durrësit. Kjo ishte dhe arsyeja se pse ai shoqërohej nga biznesmeni anglez Martin Corney dhe dhëndrri i tij shqiptar Orion Kotrri.
Negociata jo transparente
Burime konfidenciale i thanë Oligarkia.al se plani ishte që anglezët të investonin në ndërtimin e ri të Portit Tregtar në Porto Romano, çka shpjegon dhe prezencën e biznesmenit Martin Corney dhe dhëndrit të tij shqiptar, Orion Kotrri në delegacionin e Houchen.
Një muaj, pas deklaratave të Ramës për Brexit në Portin e ri të Durrësit, Autoriteti Portual deklaroi dhe skemën se si do të ndërtohej porti i ri. Sipas Pirro Vengut, porti do të ndërtohej përmes një Partneriteti Publik Privat, ku private do të financonte 54 për qind të kostos ndërsa shteti do të financonte 46 për qindëshin tjetër, përmes APD-së.
Por anglezët nuk donin të investonin paratë e tyre, ndaj Pirro Vengu i kërkoi Ministrisë së Financave që të lëshonte garanci sovrane për ndërtimin e portit të ri, edhe pse në fillim kishte deklaruar se buxheti nuk do të financonte asnjë lek për ndërtimin e Portit.
Skandali në Britani shpërtheu kur kryebashkiaku i Tees Valleyt refuzoi të regjistronte vizitën e tij në Shqipëri dhe shpenzimet përkatëse duke shkaktuar dhe debate të forta në parlament.
Lobime për takim kryeministrash?
I cilësuar si një nga njerëzit më të afër të Boris Johnson, Ben Houchen kishte dhe një tjetër mision në vizitën e tij në Tiranë. T’i paraprinte vizitës së kryeministrit të parë britanik në Shqipëri.
‘Takimi i kryebashkiakut Houchen në Tiranë vjen përpara një udhëtimi të planifikuar në vend nga Boris Johnson, më vonë gjatë vitit, për të shënuar 100 vjetorin e marrëdhënieve diplomatike. Ai do të bëhet kryeministri i parë i Mbretërisë së Bashkuar që viziton Shqipërinë vendeve,’ thuhej në njoftimin zyrtar të Bashkisë së Tees Valleyt, qershorin e vitit të kaluar.
Por vizita e Johnson në Tiranë dështoi. Vetëm një muaj pas takimit të Houchen me Ramën, Boris Johnson dha dorëheqjen nga posti i kryeministrit britanik për shkak të skandaleve të brendshme në qeveri dhe revoltës brenda partisë.
Por misioni i Houchen me sa duket nuk mbaroi me dorëheqjen e Johnson. Një burim shumë afër qeverisë i tha Oligarkia.al se Ben Houchen ishte njeriu që ndërmjetësoi takimin e Edi Ramës me kryeministrin anglez Rishi Sunak në mars të këtij viti.
Në atë kohë, Edi Rama gjendej në vorbullën e skandalit McGonigal dhe i duheshin takimet e niveleve të lartë me udhëheqësit perëndimor për të treguar në publik se çështja McGonigal nuk i kishte prekur kredencialet e tij në Perëndim./’SYRI.NET
Discussion about this post