Gati 1 milion persona kërkuan azil në BE, gjatë vitit 2022

Kërkesat për azil në Bashkimin Evropian në vitin 2022 u rritën në afro një milion, tha të martën Agjencia e Bashkimit Evropian për Azilin (EUAA).

Agjencia tha se kishte 996,000 aplikime vitin e kaluar, 53% më shumë se në 2021.

Njerëzit nga Siria, Afganistani, Turqia, Venezuela dhe Kolumbia ishin ndër grupet më të mëdha që kanë aplikuar për azil.

Gjermania mori numrin më të madh të aplikimeve me 244,000, e ndjekur nga Franca, Spanja, Austria dhe Italia.

Personave që ikën nga lufta në Ukrainë u është dhënë statusi i mbrojtjes speciale të përkohshme.

Rreth 4 milionë jetojnë në Bashkimin Evropian. Ata nuk janë pjesë e gati një milion kërkesave për azil të paraqitura vitin e kaluar.

Agjencia tha se numri i azilkërkuesve po bënte “presion akut në vendet e pritjes tashmë të tensionuara në shumë vende”.

Raporti vjen ndërsa liderët e Bashkimit Evropian debatojnë një plan të ri migracioni , veçanërisht për ata që kanë arritur në brigjet evropiane pa një rrugë ligjore.

BE kohët e fundit ra dakord për një plan që lejon shtetet ose të pranojnë një numër të caktuar migrantësh ose të paguajnë deri në 20,000 € (21,000 dollarë) për çdo person që refuzojnë.

Megjithatë, Hungaria dhe Polonia e kanë kundërshtuar planin. Kryeministri hungarez Victor Orban i tha televizionit shtetëror javën e kaluar se nuk do ta zbatonin atë.

Kancelari gjerman Olaf Scholz ka shprehur besimin në plan, duke thënë se ai u paraqet vendeve anëtare disa opsione.

Plani i migracionit ka qenë veçanërisht në fokus pasi një mbytje e anijes me emigrantë , që besohet të jetë një nga fatkeqësitë më tragjike në detin Mesdhe kohët e fundit, hodhi dritë mbi krizën e refugjatëve.