Studentët e Fakulktetit të Mjekësisë që prej orës 10:00 të paradites së sotme kanë dalë në protestë kundër projekligjit të qeverisë, i cili i kufizon tërheqjen e diplomës pas përfundimit të studimeve. Studentët bënë thirrje për mbështetje nga qytetarët dhe studentët e universiteteve të tjera.
Tashmë studentët kanë mbërritur para godinës së Kuvendit të Shqipërisë, ku po zhvillohet edhe seanca plenare e radhës.
Gjatë protestës së tyre nuk kanë munguar thirrjet si: “Bashkohuni me ne” dhe “E duam mjekësinë si gjithë Europa.”
Studentët kanë bërë thirrje për arsim cilësor teksa marshojnë kundër vendimit të qeverisë që nuk i lejon të largohen nga vendi.
‘Qeveria e turpit’, ‘E duam mjekësinë si gjithë Evropa’, ‘Përparëset tona nuk janë as blu, as vjollc as të kuqe, janë të bardha’, ‘Jemi studentë, jo të nënshtruar’, thërritën studentët teksa marshonin nga Universiteti i Mjekësisë drejt qendrës, duke bllokuar njërin aks të rrugës. Studentëve të mjekësisë iu janë bashkuar edhe ata të UBT-së.
Në një deklaratë, një nga studentët në vitin e pestë të mjekësisë, është shprehur se ky vendim është absurd dhe bie ndesh me të drejtat themelore të njeriut.
“Dje ka dalë një vendim absurd dhe marrëzi e radhës që bie ndesh me të drejtat kushtetuese dhe të drejtat themelore njeriut. Na privohet e drejta e lirisë së lëvizjes për punësim ose rritje profesionale. Sipas tyre, ose paguani gjobën ose firmën që për ne është absurditet që kurrsesi nuk mund të pranohet”.
Sipas tij, thirrja e studentëve nuk është për t’u larguar, por për të përmirësuar kushtet dhe investime në infrastrukturë.
“Ne duam të qëndrojmë në Shqipëri. Thirrja jonë nuk është për t’u larguar, por për të përmirësuar kushtet dhe investime në infrastrukturën dhe shumëçka që sistemi ynë ka nevojë. Ajo që duam është që qytetarëve t’u ofrohet një trajtim sa më i denjë dhe shërbim cilësor. Thirrja jonë nuk është për t’u larguar, kjo po keqinterperetohet e keqpërdoret nga ata që duan ta përdorin për qëllimet e tyre. Thirrja jonë është që mos i detyroni mjekët, kurrsesi nuk mund të vendosen masa detyruese. Vendimi është antikushtetues dhe i njëanshëm”.
Discussion about this post