Policia e Durrësit ka ushtruar një kontroll në banesën e Aleksandër Lahos, i njiohur ndryshe si Rrumi. Kontrolli ka ardhur pas informacioneve që policia ka pasur se Rrumi ndodhej në banesën e tij.
Nga informacionet e para mësohet se policia ka arrestuar një person me armë pa leje, por nuk ka mundur të gjejë objektivin e operacionit, Aleksandër Lahon alias Pëllumb Muharremi.
Mësohet se policia ka shoqëruar vëllain e tij, i cili më pas është lënë i lirë.
Rrumi është shpallur në kërkim me dy urdhër-arreste.
SPAK ka lëshuar urdhër arrest për Aleksandër Lahon, pas akuzave për korrupsion, dhe tjetërsim të pronave në zonën e Gjirit të Lalzit.
SPAK njoftonte nisjen e procedimit penal për korrupsion pasiv dhe aktiv, shpërdorim detyre, falsifikim dokumentesh ndërsa kërkonte caktimin e masës së sigurimit personal me karakter shtrëngues “arrest në burg”, parashikuar nga neni 238 i K.Pr.Penale, për personin A.L. (alias P.M.), i dyshuar për kryerjen e veprës penale “Korrupsioni aktiv i personave që ushtrojnë funksione publike”, kryer në bashkëpunim, parashikuar nga neni 244 dhe 25 i Kodit Penal.
“Gjatë hetimeve të këtij procedimi penal është bërë e mundur evidentimi i një skeme të mirëfilltë kriminale në falsifikimin dhe regjistrimin e pronave në vijën bregdetare të quajtur “Gjiri i Lalzit”, Durrës.
Gjatë hetimeve të këtij procedimi penal Gjykata e Posaçme e Shkallës së Parë Për Korrupsionin dhe Krimin e Organizuar me vendimin nr. 409 datë 30.10.2021 ka vendosur sekuestron preventive mbi një sipërfaqe toke prej rreth 200 000 (dyqind mijë) metra katrorë që gjendet në zonën e quajtur “Gjiri i Lalzit”, Durrës.
Po ashtu, me kërkesë të Prokurorisë së Posaçme, Gjykata e Posaçme të Shkallës së Parë për Korrupsionin dhe Krimin e Organizuar, Tiranë, me vendimin nr.497, datë 18.11.2022, ka vendosur sekuestron preventive mbi një sipërfaqe prej 203 100 (dyqind e tre mijë e njëqind) metra katrorë me vendndodhje Shetaj, (Gjiri Lalëz) Durrës”, njoftonte SPAK.
Rrumi është një personazh shumë i përfolur për lidhjet e tij me botën e krimit, ndërkohë që emri i tij u përmend edhe gjatë atentatit ndaj prokurorit Arjan Ndoji.
Gjithashtu Rrumi i Sukthit, siç njihet ndryshe Aleksandër Laho alias Pëllumb Muharremi është shpallur në kërkim edhe nga policia e Durrësit në kuadër të operacionit “Porositësi”.
Ai dyshohet se bashkë me tre persona të tjerë, mori peng një person, ngjarje e ndodhur në afërsi të fshatit Koxhaj, në autostradën Tiranë-Durrës.
Discussion about this post