Arthur Melo u rikthye te Juventusi pas huazimit aspak të suksesshëm te Liverpooli, me mesfushorin brazilian që nuk ia doli të debutonte në Premier League me skuadrën e Jurgen Klopp.
Për shkak të një dëmtimi të rëndë që e mbajti larg fushave deri në muajin shkurt. Dhe më pas për zgjedhje teknike të trajnerit gjerman.
As Juventus nuk dëshiron ta mbajë në skuadër. 26-vjeçari nuk bën pjesë në planet e Max Allegrit, ndërkohë që shërbimet e tij i janë propozuar Monzës.
Por, as te Monza nuk e duan Arthur. Drejtuesit e Juventusit propozuan huazimin e brazilianit, duke marrë përsipër të paguanin pjesën më të madhe të pagës së tij.
“Jo, faleminderit”, ishte përgjigja e marrë nga Monza, me Arthur që duhet të shohë opsione të tjera për sezonin e ri.
“Më tërheq shumë kampionati spanjoll, pasi jam përshtatur mjaft mirë në La Liga. Mund t’i jap vetes një tjetër shans nëse rikthehem në Spanjë.
Preferoj të kaloj tek një ekip që e bazon lojën te qarkullimi i topit”, deklaronte ditë më parë mesfushori.
Arthur u bë pjesë e një shkëmbimi mes Juves dhe Barcelonës në shtatorin e vitit 2020. Bardhezinjtë italianë paguan rreth 80 milionë euro për kartonin e tij, ndërkohë që në “Camp Nou” zbarkoi Miralem Pjanic.
Karriera e Arthur ka shkuar në zbritje. Sot nuk e do askush, madje as Monza, dhe ai po vuan për të gjetur një sistemim të ri.
Discussion about this post