Është mbyllur, me rezultatin 1-1, dueli mes Norvegjisë dhe Islandës, i vlefshëm për raundin e dytë të fazës në grupe të Kampionatin Europian të grupmoshës deri nën 19 vjeç.
Derbi nordik, i gjykuar nga arbitri shqiptar Juxhin Xhaja, u karakterizua, nga mungesa e saktësisë së sulmeve të të dyja skuadrave, me mundësitë e pashfrytëzuara, që ishin të shumta.
Në fraksionin e parë të lojës, iniciativën e kishte, më të theksuar kombëtarja ishullore, me sulmuesit e saj që kombinonin mjaft mirë me njëri-tjetrin, pavarësisht mos-gjetjes së rrjetës.
Nga norvegjezët, më i rrezikshmi ishte Hopland, i cili në një nga disa rastet e krijuara, i shkoi shumë afër golit të avantazhit, megjithatë portieri islandez, ishte gati dhe e priti topin me siguri.
Pjesa e parë, nuk dhuroi gola, me arbitrin Xhaja që i dërgoi skuadrat në pushim pas vetëm një minute shtesë.
Në pjesën e dytë, Islanda ishte përsëri, më kërkuese, me “blutë vullkanikë”, që rrezikuan për shumicën e kohës, portën norvegjeze, duke i shkuar rrezikshëm, në shumicën e rasteve, golit të avantazhit.
Megjithatë, në momentin më të mirë të Islandës, në minutën e 63’, Xhaja, nuk hezitoi aspak, për të akorduar një 11-metërsh, për Norvegjinë. Nga pika e bardhë, numri 6, Roaldsoy nuk gaboi duke dërguar në epërsi kombëtaren e vendit të tij.
Me këtë rezultat, islandezët, nuk kishin më asgjë për të humbur duke e shtuar presionin karshi portës së kundërshtarit, duke i shkuar disa herë pranë barazimit. Insistimi i Islandës, u shpërblye, në minutën e 89’, me Guddmundsson që barazoi shifrat me një super gol, që i dha pikët e para, ishullorëve, në fazën finale të kampionatit Europian U19.
Me 4 pikë të grumbulluara, Norvegjia, duhet vetëm të mos mposhtet në duelin me Spanjën, për të kaluar më tej.
Islanda, nga ana tjetër, do kërkojë, ndaj Greqisë, fitoren e parë absolute, në fazën finale të Kampionatit Europian të kësaj grupmoshe, duke shpresuar edhe te një fitore e Spanjës, ndaj Norvegjisë, për të siguruar fazën gjysmëfinale./m.b /gijotina.com
Discussion about this post