Partizani nis misionin Champions League, kampionët e Shqipërisë do të zbresin në fushën e lojës të martën në mbrëmje përballë BATE Borisov në “Air Albania”, në ndeshjen e parë kualifikuese.
“Të kuqtë” rikthehen nën simfoninë e Championsit pas sezonit 2019-2020, në atë kohë aventura zgjati vetëm 180 minuta pasi u eliminuan përballë Qarabag, ndërsa do të kërkojnë të përsërisin mrekullinë e para shtatë sezonesh, kur Partizani avancoi në Champions duke eliminuar hungarezët e Ferencvaros.
Kujtimet janë të largëta, por jo objektivi dhe misioni është përsëri i njëjtë, pasi tani statusi i skuadrës kampionë “peshon” disi.
Kampionët e Shqipërisë përjetuan një sezon të gjatë, me emocione që në fund u kurorëzuan me titullin kampion, por skuadra ka pësuar ndryshime në organikë.
Zoran Zekic është tashmë në krye të skuadrës dhe kujtimi i trajnerit Colella duket i largët.
Në skuadër ka pasur disa largime, por klubi ka lëvizur në merkato duke afruar emra me peshë si Grezda apo edhe Taipi.
Përballë është BATE Borisov, një skuadër që në faqet e saj të historisë mbart shumë kujtime nga ky kompeticion, por tani janë disi më të zbehta.
Ajo çfarë mund të ketë parasysh Partizani, është fakti se bjellorusët janë në gjysmën e sezonit, me skuadrën e BATE Borisov që renditet në vendin e 4 me 22 pikë, 10 më pak se vendi i parë, por prezantohen pas 3 fitoreve radhazi dhe 16 golave të shënuar dhe asnjë të pësuar.
Bjellorusët rikthehen në tokën shqiptare, pasi më parë kanë luajtur ndaj Skënderbeut (Champions League 2014-15) dhe u kualifikuan për më tej.
Discussion about this post