Fredi Beleri, kryebashkiaku i zgjedhur i Himarës, në një intervistë për gazetën greke Kathimerini, shprehet se ai u arrestua pasi Edi Rama kuptoi se po humbiste Bashkinë e Himarës.
Beleri u arrestua mbrëmjen e 11 majit 2023, në prag të zgjedhjeve bashkiake në Shqipërinë fqinje, shkruan media greke. Sipas saj, Beleri dhe ndihmësi i tij, Pandeli Kokaveshi, u arrestuan nga policia për tentativë për të blerë vota.
Pothuajse dy muaj më vonë, dhe ndërsa tashmë është zgjedhur kryetar bashkie, Beleri qëndron në paraburgim.
Nga spitali i burgut të sigurisë maksimale në Tiranë ku po mbahet, pasi u transportua atje më 19 maj për arsye shëndetësore, Beleri ka dhënë intervistën e parë ekskluzivisht për Kathimerini, në të cilën ka treguar se çfarë ka ndodhur natën e arrestimit. foli për motivet e ndjekjes së tij dhe i dërgoi mesazhe kryeministrit Edi Rama dhe qytetarëve himarjotë.
“Ata goditën sapo morën vesh se sa himariotë po përgatiteshin të shkonin nga Athina për të votuar dhe kuptuan se po humbnin Himarin. Për ata që nuk e dinë, Himara nuk përfshihet në rajonet e njohura minoritare të Shqipërisë. Mbrëmjen e së enjtes, dy ditë para zgjedhjeve, pas një dite rraskapitëse, isha ulur në një kafene me avokatin dhe një kushëri, duke biseduar dhe pushuar.
Aty më arrestuan në mënyrën kinematografike sicc arrestojnë terroristët ndërkombëtarë. Ata donin të prisnin valën e bashkatdhetarëve nga Athina që vinin për të votuar dhe të terrorizonin bashkëqytetarët shqiptarë që më përkrahnin.
Që atëherë, unë jam ndaluar dhe penguar të marr detyrat e mia. Qëllimi i tyre është që pas një mungese tre mujore nga formimi i këshillit bashkiak (më 27 qershor), të skualifikohem nga detyra dhe ata të ripërsërisin zgjedhjet, në përputhje me ligjin zgjedhor shqiptar”, tha Beleri.
Në vijim ai mohon që të jetë përfshirë në ndonjë situatë anti-ligjore sikundër e akuzon Prokuroria.
“Rreth 15 ditë para zgjedhjeve ishte e qartë nga klima politike që unë po fitoja. Në sondazhe, më shumë se tre nga 10 votues të Ramës dhe katër nga 10 votues me origjinë shqiptare votonin për mua dhe jo për kryebashkiakun e tij të zgjedhur, në largim, i cili ka 12 vjet që është në pushtet. Në shtatë ditët e fundit, vetë Rama nisi një sulm vulgar kundër meje, me ofendime dhe karakterizime të padëgjuara në diskursin publik, ndërkohë që mediat miqësore ndaj regjimit nxisnin dhunë ndaj minoritetit grek. i bëra thirrje që të përmbushë rolin e kryeministrit dhe e sigurova se një ditë pas zgjedhjeve kundërshtari im i vetëm do të jenë problemet e njerëzve dhe do të punoj me të për aq vite sa do të jetë kryeministër”, shprehet Beleri.
Sipas kryebashkiakut të zgjedhur, Prokuroria nuk e ka thirrur për asnjë pyetje deri më tani. “Më kanë mbajtur për kaq javë dhe nuk më kanë pyetur as emrin tim!
Ka shumë shkelje procedurale. Dosja e lëndës që na është dorëzuar ka qenë praktikisht e zbrazët, pa asnjë provë. Aktakuza është e mbushur me paligjshmëri dhe falsifikime”, thotë Beleri.
Discussion about this post