Kryeministri Edi Rama vijon postimet në rrjetet sociale lidhur me tensionet në Parlamentin e Kosovës, ndërkohë që në Kuvendin e Shqipërisë tensionet dhe përplasjet për mbi 4 orë u shkaktuan sepse opozita kërkonte praninë e tij në sallë.
E ndërsa në Kosovë në drejtim të Kryeministrit Albin Kurti u hodh ujë, teksa ai mbante fjalën, në Kuvendin e Shqipërisë, opozita i kërkonte Ramës të vinte në sallë të jepte llogari për ngjarjet e fundit, arratisjen e Arben Ahmetajt dhe suportin që i ka dhënë fisit Rraja.
Gjithsesi Rama ka zgjedhur që të bëjë komente lidhur me incidentin në Parlamentin e Kosovës.
“Më “mbytën” miq nga Kosova pse e paskam mbrojt Albinin, se shishen e parë e paska gjujt Bislimi dhe paska qenë VV që e paska hap kapitullin e dhunës në Kuvendin e Kosovës kur ishte në opozitë!
Nuk më duhet kush e ka gjujt shishen e parë, mbase keni të drejtë ju, mbase jo, por nëse demokracia parlamentare katandiset në kush gjujti i pari atëherë kemi një problem edhe me kuptimin e demokracisë, edhe me kuptimin e këtij momenti kyç për Kosovën, e cila nuk ia ka borxh askujt besoj shfaqjen skandaloze të ditës së sotme.
Dhe si dikush që e di mirë se sa poshtë ka rënë Kosova në sytë e krejt botës demokratike për shkak të qasjes së gabuar të qeverisë së saj, unë vazhdoj mendoj se çka ndodhi sot është e turpshme dhe jam i bindur se justifikimi i asaj shëmtie nuk e ndihmon, po e dëmton ende më shumë reputacionin e Kosovës, prandaj thashë dhe e them prapë se uroj që opozita të distancohet nga një shëmti e tillë”, shkruan Rama.
Discussion about this post