Bardhi: Ahmetaj, një segment, kanë vepruar si organizatë kriminale

Deputeti Gazment Bardhi tha mbrëmjen e sotme në Opinion se është i tronditur se si ka vepruar i gjithë shteti shqiptar për 3 inceneratorët.

Bardhi tha se Arben Ahmetaj është vetëm një segment, pasi është vepruar sikur kemi të bëjmë me një organizatë kriminale.

“Procedurat ishin përgatitur përpara se të shpallej emergjenca mjedisore në Elbasan. Çdo procedurë ishte poërgatitur nga zyra private e Klodian Zotos. Edhe përgjigjet përgatiteshin nga zyra e Zotos, pra nëse një institucion kishte një përgjigje, atëherë përgjigjen e përgatiste kjo zyra private”, tha Bardhi, duke u shprehur se këto janë pjesë e dosjes së SPAK.

Sipas deputetit demokrat, vetëm me një të rënë të lapsit nga dreka në darkë, është shtuar vlera 5.6 mln euro, për të njëjtën sasi punimesh, vetëm për 1 incenerator.

“Ka edhe një detaj, që tigri ishte Klodian Mërtiri, ndërsa Arben Ahmetaj ishte “frattello”. Mërtiri ka shfrytëzuar influencat që kishte Ahmetaj në Partinë Socialiste.

Erion Veliaj përmendet në dosjen e SPAK për inceneratorin e Tiranës, ndërsa Damian Gjiknuri përmendet njëlloj si Arben Ahmetaj, pra janë në të njëjtën pozitë”, tha Bardhi.

Ai tha se Ahmetaj ka qenë i përfshirë në këtë aferë, por nuk është koka e aferës së inceneratorëve. “Ahmetaj ka rritur fondet për Ministrinë e Mjedisit, që të rriteshin pagesat për inceneratorëve dhe këto hartoheshin nga zyra private e Zotos”, tha Bardhi.

Sipas tij, koka e aferës është Edi Rama. “Nuk ka pasur nevojë Edi Rama të takohej me Zoton apo Mërtirin, pasi takonte Ahmetajn dhe Gjiknurin”, tha Bardhi.