Pulisic: Do doja që të bëja më shumë te…

Futbollisti amerikan i Milanit, Kristian Pulisic ka vuajtur mungesën e mundësive te Chelsea përpara se t’i bashkohej “Djallit” këtë merkato vere me një transferim që kapi shifrën e 24.2 milionë eurove.

24-vjeçari, me origjinë kroate iu bashkua “Bluve të Londrës” pas 4 sezonesh me gjermanët e Borussia Dortmund. Me “blutë” realizoi 26 gola në 145 ndeshje dhe u shpall kampion Europe në vitin 2021.

Pasi shënoi 19 gola në 3 sezonet e para të Premier League-s, amerikani shënoi vetëm 1 herë në sezonin 2022-2023 dhe asnjë gol në 20 ndeshjet e fundit që nga 8 tetori i kaluar. Gjatë konferencës për shtyp në prezantimin e tij me Milanin, Pulisic u shpreh:

“Unë nuk i pata mundësitë që doja gjatë viteve të fundit, dhe nuk arrita dot në nivelin që synoja. Tani është një mundësi e artë për mua për t’ia rinisur nga e para. Do të kisha dashur të bëja më shumë te Chelsea, por tani është një sfidë e re për mua dhe jam shumë entuziast.”

Performanca më e bukur dhe më e paharrueshme për Pulisic me fanellën e Chelsea-t ishte ndeshja gjysmëfinale kundër Realit në Champions League, në vitin 2021. Atë vit “Blutë e Londrës” ngritën lart trofeun. Por këtë vit, në fund të një sezoni të dështuar, në të cilin u renditën të 12-t në Premier, Pulisic iu bashkua listës së gjatë të lojtarëve të cilët lanë ekipin.

Milani e përfundoi sezonin në vendin e katërt duke siguruar një vend ne Champions League sezonin e ardhshëm dhe për Pulisic kjo është një mundësi e artë për të treguar veten në Itali. Gjithashtu Pulisic kishte fjalë të mira edhe për trajnerin e kuqezinjve, Stefano Pioli:

“Ai më bëri të ndihem fiks siç ndihem tani, tregoi që dëshironte të më bënte pjesë të ekipit të tij dhe më tha që do të jem pjesë e rëndësishme e ekipit, këto ishin fjalët që doja të dëgjoja nga Pioli”.

Pulisic te Milani do të mbajë veshur fanellën me numrin 11, fanellë e trashëguar nga një tjetër futbollist me origjinë kroate (nga e ëma), Zlatan Ibrahimovic. Amerikani e di peshën e kësaj fanelle, pasi është mbajtur nga një ikonë e klubit, siç ishte Zlatan.