Një zyrtar policie i shkarkuar me firmën e Muhamet Rrumbullakut dhe i përjashtuar nga Policia e Shtetit disa muaj më parë, iu shfaq Drejtorit të Përgjithshëm të Policisë “ballë për ballë” në një takim zyrtar që pati me kryebashkiakun e Shkodrës, Benet Beci.
Bëhet fjalë për ish-shefin e komisariatit Pukë, Pjerin Lazrin, i përjashtuar nga rradhët e policisë, në nëntor 2022, pas videos së transmetuar në emision televiziv “STOP” duke rrahur një qytetar.
Nuk dihet se çfarë pozicioni mund të ketë Lazri në administratën e Bashkisë Shkodër që drejtohet nga Benet Beci, por ai ishte pjesë e një takimi mes kryebashkiakut, Drejtorit të Përgjithshëm të Policisë dhe drejtorit të Policisë Vendore, Ervin Hodo.
“Kryetari i Bashkisë Shkodër, Benet Beci, pati një takim në Bashki me Drejtorin e Përgjithshëm të Policisë së Shtetit, Drejtues Madhor Muhamet Rrumbullaku, i shoqëruar nga Drejtori i Policisë Vendore Shkodër, Drejtues i Parë Ervin Hodo.
Në takim është diskutuar për forcimin e bashkëpunimit mes strukturave të Bashkisë dhe Policisë së Shtetit, me qëllim rritjen e parametrave të sigurisë dhe qetësisë publike si dhe të efikasitetit të punës së strukturave vendore.
Miratimi i marrëveshjes së bashkëpunimit për aksesin e Policisë Bashkiake në sistemin e gjobave, mbështetja e Policisë së Qarkullimit Rrugor në drejtim të lehtësimit të qarkullimit veçanërisht gjatë sezonit veror, ishin disa nga çështjet e trajtuara në këtë takim.”,- shkruhet në postimin e bashkisë.
Discussion about this post