Gjatë fundjavës së kaluar drejtuesit e një klubi të njohur të Kategorisë Superiore, u përpoqën të sqaronin situatën që po kalon klubi në një takim që kishin me tifozët, të organizuar në stadiumin e qytetit.
Mirëpo, pasi kanë kaluar disa ditë nga ajo mbledhje, kur merrte pjesë edhe vetë kryetari i Bashkisë Shijak, Elton Arbana, e ardhmja e Erzeni është ende e turbullt.
Shoqata KF Erzeni, që ka nën administrim klubi dhe që ka disa anëtari bordi, nuk ka bërë ende një hap konkret se si do të vijojë financimi i ekipit.
Aktualisht mësohet se nuk ka garanci për vazhdimësinë, pasi edhe sponsorët që duan të mbështesin klubin, janë të paqartë sa i përket formës juridike të KF Erzenit.
Bashkia Shijak është përpjekur të bëjë ditët e fundit rolin e negociatorit me aksionerët dhe sponsorët e sezonit të kaluar, për gjetjen e një zgjidhjeje të shpejtë.
Madje së fundmi është lakuar edhe kërkesa e një biznesmeni shqiptar që jeton në Australi për të blerë aksione në klub.
Mirëpo, fakt është që tek Erzeni janë kthyer makthet e verës së kaluar, ku ekipi shijakas ishte i fundit që nisi organizmin dhe përgatitjet për Superioren.
Nuk dihet tashmë se kush do të jenë ata që do të financojnë skuadrën, stafi i ri teknik dhe sigurisht përbërja e ekipit, paçka se një pjesë e futbollistëve kanë kontratë edhe për sezonin e kaluar.
Problemi më i madh janë financat, por në Shijak duhet zgjidhur fillimisht se kush do të administrojë klubin. Pritet të ketë sërish një mbledhje të iniciuar nga kryebashkiaku Arbana./PanoramaSport
Discussion about this post