Zëdhënësja e Partisë Demokratike, Ina Zhupa ka reaguar lidhur me rastin e publikuar sot për një mësues në qytetin e Beratit, i cili rezultonte i dënuar për “pedofili” dhe “ngacmim seksual”. Zhupa shprehet se keqardhja e ministrave kur konstatohen këto raste nuk vlen, pasi detyra e tyre është parandalimi i abuzimeve me fëmijët. Zhupa e ka cilësuar si kriminale sjelljen e institucioneve arsimore.
“Kriminale sjellja e institucioneve arsimore në pranimin e një mesuesi me rekorde si i dënuar për pedofili dhe ngacmime seksuale. Ndërkohë që çdo ditë po dëgjojmë raste të tmerrshme me abuzimin me fëmijët, të tilla vendimarrje janë shenja e pastër sa seriozisht e kane në parandalimin e ketyre ngjarjeve monstruoze! Ministrat nuk kanë detyrë të shprehen thjesht keqardhje kur ndodhin rastet por të bëjnë punën e tyre që ti shmangnin abuzimin me fëmijët. “
Zëdhënësja e Partisë Demokratike ka kërkuar marrjen e masave në largimin nga puna si mësues të 62-vjeçarit, teksa thekson se duhen kryer kontrolle në mënyrë që raste të tilla të mos përsëriten.
“Si deputete, anëtare e komisionit të edukimin kërkoj publikisht nga ministria e arsimit të marr masa për largimin e tij nga puna në shkollën 9-vjeçare “22 Tetori” të qytetit të Beratit. Si dhe të marr masa kontrolli që asnjë me këto rekorde të mos jetë aktualisht i punësuar në shkollat e fëmijëve shqiptar dhe mos ketë asnjë mundësi punësimi në të ardhmen”, shprehet Zhupa
Prej disa ditësh në shkollën “22 Tetori” në Berat është emëruar mësues për lëndët e Fizikës dhe Informatikës 62-vjeçari, Ëngjëll Bregu, që rezulton të jetë dënuar për “pedofili” dhe “ngacmim seksual” të fëmijëve në vitin 2003. Kanë qenë pikërisht prindërit e fëmijëve ata që e kanë shprehur këtë shqetësim për mediat, duke kërkuar largimin e mësuesit nga shkolla, largim që është kërkuar prej tyre edhe drejtorisë së shkollës, e cila ka dalë me justifikimin se ai është emëruar nga DAR.
Discussion about this post