Detaje të reja janë zbardhur nga ekzekutimi i 42-vjeçarit Nikolin Lekstakaj, i cili kishte ndryshuar mbiemrin në Marku.
Viktima u qëllua me breshëri automatike nga një automjet që ishte në lëvizje, ndërsa dyshohet se 42-vjeçari ka qenë i survejuar gjatë ditës, deri në momentin e vrasjes.
Nga raportimet e fundit mësohet se Nikolin Lekstakaj në momentin kur është qëlluar, sapo është ndarë nga i vëllai të cilit i ka marrë automjetin, duke shkuar nga banesa në market.
Dyshimet paraprake janë se vrasja e Lekstakajt, i cili e kishte ndryshuar mbiemrin në Marku në vitin 2013, vjen si pasojë e gjakmarrjes mes dy fiseve Lekstakaj e Nikulaj.
Por kush është viktima i kësaj të mërkure, i cili njihej edhe me nofkën “Toli”?
Një borxh prej 5 mijë lekësh, i marrë pikërisht nga “Toli” në vitin 1997 në një pikë karburanti, u bë shkak për një histori 26-vjeçare gjakmarrjeje mes palëve, me disa viktima.
I fundit që u ekzekutua pikërisht si pasojë e kësaj hasmërie ishte biznesmeni Ardian Nikulaj. Ai u vra në lokalin e tij në Shëngjin të Lezhës më 19 prill. Për këtë ngjarje, autoritetet thonë se porositës ishte Edmond Haxhia, nip i Lekstakajve.
Duket se autorët e kanë shënjestruar prej kohësh Lekstakajn, pasi ky nuk është atentati i parë i ngritur ndaj tij.
Raportohet se Lekstakaj, i kishte shpëtuar një atentati në vitin 2012. Mësohet se një sasi lënde plasëse ishte vendosur në mjetin e tij BMË X5 dhe shpërtheu gjatë lëvizjes, por Lekstakaj nuk pati dëmtime.
Discussion about this post