I dërguari i Bashkimit Evropian për dialogun Beograd-Prishtinë dhe çështje të tjera të Ballkanit Perëndimor, Miroslav Lajçak, këtë të shtunë gjatë fjalës së tij në Forumin e Integrimit Ballkanik që po mbahet në Podgoricë, deklaroi se BE nuk ka alternativë tjetër përveçse të anëtarësojë Ballkanin Perëndimor.
“Alternativa e vetme është anëtarësimi i plotë i këtyre vendeve në BE”, u shpreh Lajcak.
Sipas tij nëse kjo gjë nuk ndodh Bashkimi Europian mund të humbasë Ballkanin Perëndimor, të cilin e cilësoi si të përkushtuar ndaj vlerave të BE-së.
“Ajo që kam frikë është se mund ta humbasim Ballkanin Perëndimor, i cili është i përkushtuar ndaj vlerave tona.”
Lajçak shtoi se në mungesë të alternativave, ku në vend që të krijohen shtete ligjore, media të pavarura, shoqëri civile dhe gjyqësorë të depolitizuar, ekziston rreziku i forcimit të tendencave autoritare joliberale. Një Ballkan i tillë, sipas tij, do të ishte një instrument ndryshimi për interesat strategjike të lojtarëve të tjerë.
“Kjo është arsyeja pse ne duhet të përshpejtojmë procesin e zgjerimit. Ne duhet të shohim gjërat në mënyrë reale dhe sa sinjale të forta pozitive po i dërgon rajoni Bashkimit Evropian”, tha Miroslav Lajçak në Forumin e Integrimit ballkanik në Podgoricë.
Discussion about this post