Emrat/ Tragjedia në Liqenin e Banjës, ja kush janë viktimat

Katër persona të moshës nga 14 në 46 vjeç humbën jetën pasditen e sotme, teksa ishin future për tu larë në Liqenin e Banjës në Gramsh.

Viktimat janë babai dhe dy djemtë, si dhe një kushëri i tyre. Personat që kanë humbur jetën në ngjarjen tragjike janë Arben Zogu 46 vjeç dhe dy djemtë e tij, Rubens Zogu 19 vjeç e Esti Zogu 14 vjeç, si dhe kushëriri i tyre Melsi Zogu 20 vjeç.

Policia është njoftuar nga familjarë të viktimave rreth orës 19:00, ndërsa mendohet se 4 personat që kanë humbur jetën janë future në Liqen rreth orës 15:00.

Buzë liqenit policia ka gjetur rrobat e viktimave, 3 celularë dhe dy biçikleta.

Ndërkohë që polumbarët e RENEA kanë nisur kërkimet në Liqenin e Banjës për gjetjen e trupave.

NJOFTIMI I PLOTË:

Rreth orës 19:00, Salla Operative e Komisariatit të Policisë Gramsh ka marrë një telefonatë se 4 shtetas dyshohet se janë mbytur në Liqenin e Hidrocentralit të Banjës.

Menjëherë kanë shkuar shërbimet e policisë, grupi hetimor dhe zjarrëfikësit, ku ka rezultuar se:

Në Liqenin e Hidrocentralit të Banjës në fshatin Drizë të Gramshit, dyshohet se shtetasit A.Z, rreth 46 vjeç, R.Z, 19 vjeç, E.Z, 14 vjeç , (babai me dy djemtë) dhe kushëriri i tyre shtetasi M.Z, 20 vjeç, sipas deklarimeve të familjarëve janë futur në liqen për tu larë dhe nuk kanë dalë më.

Gjiihashtu menjëherë në drejtim të liqenit janë nisur polumbarët e Reneas për të bërë të mundur gjetjen dhe nxjerrjen e katër shtetasve nga liqeni.

Grupi hetimor ka gjetur në buzë të liqenit dy motoçikleta, tre celularë dhe teshat e trupit.

Në drejtimin e Prokurorisë, grupi hetimor vijon punën në vendngjarje për sqarimin dhe dokumentimin e plotë të rrethanave të ngjarjes.